Сэтинньи 27 күнүгэр киэһэ 6 чаастан «Ыалга олоҥхолооһун» бырайыак чэрчитинэн, Чурапчы Чакырыттан биллэр олоҥхону толорооччу Григорьев Николай Никитич ыҥырыллан кэлэн, Б.Н.Михайлов, Г.В.Нельбисова Жатайга саҥа туттан киирбит чааһынай дьиэлэригэр Эрилик Эристиин «Буура Дохсун» олоҥхотун олоҥхолоон иһитиннэрдэ, хонон-өрөөн ааста. Былыргы саха ыалын үгэһинэн, дьиэлээхтэр олоҥхоһуту күндү ыалдьыт быһыытынан маанылаан көрүстүлэр, ас эгэлгэтин астаан, сандалы тула олордон олоҥхоһуту, кэлбит ыалдьыттары күндүлээтилэр. Ыаллар 4 саастаах кыра сиэннэрэ Тимур Симонов кытары олоҥхону сэргээн иһиттэ, олоҥхоһут диэн күндү ыалдьыт эбитин көрө сэҥээрдэ. Нөҥүө күнүгэр ыаллар, олоҥхоһукка махталларын биллэрэн, илии тутуурдаан, өттүк харалаан атаардылар. Маннык үтүө киэһэлэр салҕана турдуннар, олоҥхоһут кэлэр дьоро киэһэлэрэ олохтонон истиннэр.
Олоҥхо дьоро киэһэтин кыттыылааҕа. Ахсынньы 1 күнэ, 2021 с