Ахсынньы 10-11 күннэригэр Сунтаар улууһугар «Алыптаах мааска» диэн республиканскай фестиваль 6 төгүлүн ыытылынна. Бу күрэскэ Үөһээ Бүлүүттэн, Амматтан, Сунтаартан, Мэҥэ Хаҥаластан, Хаҥаластан, Ньурбаттан норуот тыйаатырдара кыттыыны ыллылар.
Дьүүллүүр сүбэ:
П.А. Ойуунускай аатынан Саха Академическай тыйаатырын үлэһитэ, Россия тыйаатырдарын союһун чилиэнэ Осипова Надежда Осиповна; СӨ үтүөлээх артыыһа, СӨ культуратын туйгуна, П.А.Ойуунускай аатынан Саха Академическай тыйаатырын артыыһа Апросимов Михаил Михайлович; СӨ үтүөлээх үлэһитэ, СӨ култууратын туйгуна, Олоҥхо тыйаатырын артыыһа, олоҥхоһут Исаков Валентин Гаврильевич; Республикатааҕы НАДь тыйаатырга сүрүннүүр үлэһитэ Захаров Алексей Константинович; Дьүүллүүр сүбэ бэрэсэдээтэлэ, СӨ култууратын үтүөлээх үлэһитэ, «Алыптаах мааска» Республикатааҕы норуот тыйаатырдарын көрүү күрэс ааптара Очосов Юрий Дмитриевич үлэлээтилэр.
Бастакы күн «Партизан НАТК» дьиэҕэ
Хаҥалас Күөрдэмнээҕи норуот тыйаатыра «Сэрии тыйыс тыына» диэн испиктээгинэн күрэһи саҕалаатылар.
Иккиһинэн Ньурба улууһун Дьаарханнааҕы «Хартасова-Терентьева Христина Ильинична аатынан куукула норуодунай тыйаатыра» Гаврил Дуяков «Кыыс Дьуурайа бухатыыр» олоҥхоттон 6 көстүүлээх, 4 хартыыналаах олоҥхо испиктээк көрдөрдүлэр. Дьаархаттар бу кыттыыларын анаатылар СӨ култууратын туйгунугар, култуура байыаһыгар Юрий Емельянов сырдык кэриэһигэр.
Киэһэ 4:30 чаастан Үөһээ- Бүлүүлэр испиктээктэрин кэннэ тэрээһин үөрүүлээх аһыллыыта өрө таһымнаахтык ыытылынна. Сунтаар норуот тыйаатырын 60 үбүлүөйдээх сыла буолан артыыстар эҕэрдэ суругунан, махтал суругунан, мэдээлинэн наҕараадаланнылар. Улуус баһылыга Анатолий Васильевич Григорьев ис сүрэҕиттэн эҕэрдэ, махтал тылларын «Алыптаах мааска» фестиваль кыттааччыларыгар уонна бэйэтин улууһун тыйаатырын артыыстарыгар эттэ.
Иккис күн Ньурба улууһун Антоновка нэһилиэгин «Айуу, чэ» норуот тыйаатыра «Ойуун түүлэ» диэн испиктээгинэн саҕалаатылар. Барыта олус долгутуулаах. «Саамай түмүк кэтэһэртэн киһи долгуйар», — диэн куукула тыйаатырын артыыһа бэйэтин санаатын үллэстэр.
«Алыптаах мааска» республиканскай фестивальга куукула норуодунай тыйаатырын ситиһиилэрэ:
» Лучшая работа художника по костюмам» диэн номинацияҕа тигистэ Джулия Романовна Николаева «Лучшая работа оператора по звуку» номинацияны ылла Елизавета Павловна Осипова. Инникитин да бу тыйаатырга ситиһиилээх үлэни баҕарабыт.
Куукула норуодунай тыйаатыра республикаҕа соҕотох тыйаатыр буолан өрүү дьон интэриэһин тардар.