Миитэрэй барахсан

Айылҕаттан айдарыылаах олоҥхону толорооччу, норуот ырыаһыта, алгысчыт, хомусчут, ырыа айааччы, ССРС култууратын туйгуна, СӨ култууратын туйгуна, СӨ култууратын үтүөлээх үлэһитэ, үлэ бэтэрээнэ, Нам улууһун, Бартыһаан, Таастаах нэһилиэктэрин Ытык киһилэрэ, өрөспүүбүлүкэҕэ соҕотох хомусчуттар норуодунай «Дьүрүл» ансаамбылларын төрүттээччитэ уонна солбуллубат салайааччыта

Дмитрий Иванович Кривошапкин

элбэхтик ырыатыгар хоһуйбут орто дойдутуттан букатыннаахтык барбытынан Олоҥхо Тыйаатыра автономнай тэрилтэ, Олонхо Ассоциацията уопсастыбаннай тэрилтэ уонна  Олоҥхо Киинин үлэһиттэрин аатыттан халыҥ сис аймах Кырбаһаакыттарга, бииргэ төрөөбүттэригэр, бары чугас дьонугар, биир дойдулаахтарыгар Олоҥхо Тыйаатырын, Олоҥхо Ассоциацията уопсастыбаннай тэрилтэ уонна Олоҥхо Киинин үлэһиттэрин ааттарыттан дириҥ кутурҕаммытын биллэрэбит.

Дмитрий Иванович 1940 с. Нам улууһун Бартыһаан нэһилиэгэр Соһу аҕатын ууһугар төрөөбүтэ. Оҕо сааһыттан тыа сиригэр араас үлэҕэ эриллэн улааппыта. Олоҥхону, хомуһу үйэтитиигэ, эдэр ыччакка тиэрдиигэ утумнаахтык үлэлэһэр биир күөн туттар киһибит этэ. Хомус дьүрүһүйэр дьикти алыптаах тылынан урааҥхай саха ырыата-тойуга атын омуктан уратылаах буоларын умсугуйан туран, ыччакка тиэрдэр, омук сирин дьонугар биһирэтэр үлэтэ хас да көлүөнэҕэ бэриллэн, тэнийэн кэллэ. Дмитрий Иванович норуот айымньытын бары көрүҥнэригэр дэгиттэр талааннааҕа, ону таһынан симик буолан баран, көхсүгэр охсор кылыһахтаах куолаһа, хомуска дьырылаччы тардара, олоҥхотун иэйэн туран толороро, дойдутун уйгу ыһыахтарыгар алгыс түһэрэн, иһиллээбиттии иһийэн турара бу баар курдук… Бартыһаан бөһүөлэгин олохтоохторун барыларын кэриэтэ, хомус алыптаах муусукатыгар уһуйбут үтүөлээх, үс кэрдиис түһүмэхтээх, уһуйаантан саҕалаан, оскуолаҕа хомуска тардыытын үөрэҕин киллэрэн, маассабай хомустааһыны бастакынан өрөспүүбүлүкэҕэ олохтообут үтүөлээх киһи булар.

«Олоҥхо Ассоциацията» улуустааҕы филиалын актыыбынай чилиэнэ этэ. 2008 с. кини “Дьулуруйар Ньургун Боотур” олоҥхоттон туруоруутун Хамаҕатта саха-француз лицейин үөрэнээччилэрэ Францияҕа көрдөрбүттэрэ күн бүгүҥҥэ диэри истиҥник ахтыллар. Ийэ тыл сүмэһинин сүрэҕэр иҥэринэн, уран тыл маастара буолан, үүнэр көлүөнэҕэ билиитин-көрүүтүн, сатабылын ууран туран, норуот тылынан уус-уран айымньыта сайдарын туһугар айымньылаахтык үлэлэһэн кэлбитэ. Сыл аайы ыытыллар «Уруйдан, улуу олоҥхобут» фестиваль Гран-при хаһаайына, дипломана. Олоҥхо Ыһыаҕын куонкурустарын саамай көхтөөх кыттааччыта, лауреата буолар. Дмитрий Иванович «Кындыа маҥан аттаах Күндэлэй Бухатыыр» олоҥхото үүнэр көлүөнэни иитиигэ төһүү күүс буола туруо диэн эрэллээхпит.

Ытык киһибит Дмитрий Иванович, быдан льылларга быраһаай,  төрөөбүт төрүт буоруҥ сылаас суорҕан, сымнаҕас сыттык буоллун. Эн сырдык мҥссүҥнүн үйэлэргэ умнуллуо суоҕа.

Олоҥхо Тыйаатыра автономнай тэрилтэ,

Олоҥхо Ассоциацията уопсастыбаннай тэрилтэ, Олоҥхо Киинэ