Күндү Валентина Пантелеймоновна!
Киһи барахсан – Айыы аартыгын арыйар, күн суолун тутуһар, арҕаһыттан тэһииннээх, көхсүттэн көнтөстөөх, өркөн өйдөөх аатыран орто туруу дойдуга – күн сиригэр мутугунан быраҕар муҥур үйэтигэр өйүнэн-санаатынан тугу эрэ ыйдаҥардан сырдатаары, илиитинэн-атаҕынан тугу эмэ оҥорон туһалаары, кэнэҕэски кэлэр кэнчээригэ кэскиллээҕи, үүнэр көлүөнэҕэ үйэлээҕи хааллараары олорор буоллаҕа эбээт…
Ытык-мааны эдьиийбит, ыллам үтүө киһибит – Валентина Пантелеймоновна!
Эн кэссиэ, кэрэмэс буолуу аатын үрдүктүк тутан олорон кэлбит олоҕуҥ, айымньылаах дьоһун үлэҥ усталаах-туоратыгар сайдам-сайаҕас сахаҥ дьонугар сардаҥалаах күнү сандаардаары оспот олук үктээн, дириҥ далай түһүлгэни түстэһэн, уйулҕа уолбат ойбон уйгутун олохтоһон киһи быстыбат бырдалааҕа, эстибэт сэниэлээҕэ, сылайбат сындааһыннааҕа буолан кэллиҥ.
Бүгүн айбыт Айыыларбыт алгыстарынан аҕыс уонус хааргын алдьатан олорор түс-бас күҥҥэр тоҥтон толлубатах, ириэнэхтэн иҥнибэтэх туруу дьоннорбут ытык ааттарыгар Эн үрдүк, үтүө ааккын айхаллыыр аньыы буолбата буолуо. Бу уһун сылларга үөл талах курдук эриллэн, иирэ-талах курдук имиллэн муора далай сырдык санааҥ муҥурдаммакка төрөөбүт норуоккар, Сахаҥ сиригэр төлкө түстэһэн төһөлөөх ыллам ыллыгы ыйсан, сиэри ситиһэн, туому тутуһан, уһуйан-такайан кэлбитиҥ буолуой?! Ити да иһин, Эн олорбут олоҕуҥ суола суолдьут буолан, айымньылаах үлэҥ аргыс сулус буолан улуускар, бүтүн Сахабыт сиригэр саха тыллаахха сылааһынан сыдьаайар күндү киһи, үтүө доҕор, мындыр сүбэһит – Далбар Хотун буоллаҕыҥ!
Бу даҕаны иһин, Эн биһиэхэ Айыы киһитин амарах майгытын, саха киһитин сайдам санаатын дьиҥнээхтик илдьэ сылдьар баай дууһалаах, барҕа санаалаах энчирээбэт эркээйибит буолаҕын.
Ытык-мааны күндү киһибит – Валентина Пантелеймоновна! Эн албан аатыҥ аартыктары арыйсан, саха сай бараан майгытын саҕан тоҕус үйэ тухары дуораһыйа, аҕыс үйэ тухары алла-асхарыйа, сэттэ үйэ тухары сириэдийэ чэчирии туруохтун!
Уруй-айхал!
Туску-мичил!
Нөрүөн-нөргүй!
Үгүрү-сүгүрү!