Бүгүн, кулун тутар 16 күнүгэр, Алексей Елисеевич Кулаковский – Өксөкүлээх Өлөксөй (1877-1926) төрөөбүтэ 145 сыла.

А.Е. Кулаковский 1877 сыллаахха кулун тутар 16 (эргэ халандаарынан 4) Боотуруускай улуус Дьохсоҕон нэһилиэгэр төрөөбүтэ, кылгас да буоллар, араас түгэннэринэн баай олоҕор үгүһү айан, туохха да тэҥнэммэт нэһилиэстибэ хаалларбыта бүгүҥҥү күҥҥэ үлэлии турар.

Поэт, бөлүһүөк   А.Е.   Кулаковскай   ылсыбыт   үлэтэ   барыта   норуотугар анаммыт алгыһынан саҕаланан айымньылаах аартыктары арыйаллар. Кини олоҕун саха омук сайдарын туһугар анаабыта, норуотунан киэн туттара, сүгүрүйэрэ. Бу олоҕун сүрүн ис хоһооно буолан, айар да, чинчийэр да үлэтин Духуобунай тирэҕэ буолбута саарбаҕа суох, ол туоһута ханнык да көлүөнэ дьоҥҥо суолтата сүппэккэ, саҥаттан саҥа суоллары арыйар, чинчийэр кыаҕы үөскэтэр.

Өксөкүлээх Өлөксөй олоҕун ураты бэлиэтинэн кини историческай кэмин дьонун общественнай өйүн-санаатын салайсыбыта, сайыннарбыта, дириҥ силистээх духуобунаһын өйдөөн, харыстаан, үйэтитэн хаалларбыта буолар.

«Саха интеллигенциятыгар сурук» — Саха Сирин национальнай интеллигенциятын билиитэ-көрүүтэ кэҥииригэр сүдү суолталаах сурук буолбута. Тыҥаан турар кыһалҕаны аһаҕастык ааттаан, быһаарар суоллары киэҥник көрөргө туһаайар. Өскө саха омук культураны сайыннарар суолу тутуспатаҕына, сир үрдүттэн сүтүөн сөбүн сэрэтэр. Алексей Елисеевич туһаайыыта, күн бүгүн да тыыннаах хаалар суолу ыйарынан, суолтата сүппэккэ үйэттэн үйэҕэ норуокка быыһанар күүс буолар.

c сайта https://nvk-online.ru/new/b-g-n-ajar-tyl-a-ata-ks-k-leeh-l-ks-j-t-r-b-te-145-syla/