Күндү доҕоттор! Кулун тутар 18-19 күннэригэр «Ыччат Олоҥхоһут» өрөспүүбүлүкэтээҕи общественнай түмсүү сыллата ыытар «КУЙУУР ОЛОҤХОТО-2022» тэрээһиммитин ыытан кэллибит.
Быйылгы куйуурбут олоҥхотун Мэҥэ-Хаҥалас улууһун чулуу олоҥхоһуттара Степанов Николай Иванович — Ноорой төрөөбүтэ 125 сылыгар, Колесов Гаврил Гаврильевич төрөөбүтэ 90 сылыгар анаан, 1-кы Тыыллыма төрүттэммитэ 200 сылын бэлиэтиир тэрээһиннэр чэрчилэринэн ыыттыбыт.
Өрөспүүбүлүкэтээҕи күөн күрэскэ 8 улуустан (Амма, Мэҥэ-Хаҥалас, Чурапчы, Хаҥалас, Өлүөхүмэ, Бүлүү, Нам, Дьокуускай) уопсайа 10 ыччат кытынна. Дьүүллүүр сүбэҕэ бырайыак ааптара Галина Семеновна Попова — Санаайа (Председатель), Ульяна Михайловна Флегонтова, Виталий Витальевич Никифоров уонна бэйэм үлэлээтибит.
Икки күннээх тохтобула суох тыҥааһыннаах киирсии кэннэ маннык түмүгү таһаардыбыт:
КЫЛААН ЧЫПЧААЛ үрдүк аатын Станислав Иванов (Бүлүү) сүгэн, СӨ Ил-Дархана Айсен Сергеевич туруорбут анал бирииһин, «Куйуур Олоҥхото-2022» анал кубогын уонна 10.000 подарочнай сертификаты тутта.
1-кы миэстэни — Прасковья Лебедева (Хаҥалас) ылан, Александр Николаевич Жирков туруорбут Ил-Түмэн кыһыл дуйдаах чаһыытын уонна Гаврил Колесов төрөппүт кыыһа Колесова Оксана Гаврильевна туруорбут А. Чикачев хартыынатын тутта.
2-с миэстэни — Яна Ньюргусова (Нам) ылан, 1-кы Тыыллыма нэһилиэгин мецената Афанасий Павлович Кириллин туруорбут 5.000 уу харчынан бирииһи тутта.
3-с миэстэни — Анастасия Алексеева (Чурапчы) ылан, 1-кы Тыыллыма нэһилиэгин мецената Евгений Семенович Павлов туруорбут 5.000 уу харчынан бирииһи тутта.
Итини тэҥэ, хас биирдии кыттааччы анал номинациянан уонна уу харчынан, сыаналаах бирииһинэн наҕараадаланан илии тутуурдаах, өттүк харалаах барда.
Түмүктээн эттэххэ, тэрээһиммит чахчы үрдүк таһымнаахтык ааста. Маныаха, бастатан туран 1-кы Тыыллыма нэһилиэгин аҕа баһылыгар Константин Васильевич Лепчиковка уонна үөлээннээхпитигэр, ытыс үрдүгэр далбардаан көрсүбүт Виталий Витальевич Никифоровка махтанабын!
Итини тэҥэ бу тэрээһиҥҥэ кыттыспыт тэрилтэлэргэ: СӨ «Олоҥхо Киинигэр», ХИФУ Олоҥхо научнай-чинчийэр институтугар, СӨ «Олоҥхо Ассоциациятыгар», СӨ АТ «Олоҥхо Театрыгар», Г.Г. Колесов аатынан Мэҥэ-Хаҥалас улууһун «Олоҥхо Дьиэтигэр», Степанов Н.И. — Ноорой уонна Колесов Г.Г. хаан урууй аймахтарыгар барҕа баһаам МАХТАЛБЫТЫН биллэрэбин!
