Бүгүн, муус устар 5 күнүгэр, Үөһээ Бүлүүгэ аны сайын ыытыллыахтаах XV өрөспүүбүлүкэтээҕи Олоҥхо ыһыаҕын иитинэн бастакы улахан түһүлгэ түстэннэ. ⠀
Ол курдук, бүтүн саха омугун, төрөөбүт тылын, төрүт үгэстэрин, култууратын, улуу айымньыбыт олоҥхо сайдыытын саҕахтарын түстүүр улахан тэрээһин, «XV Олоҥхо ыһыаҕа Үөһээ Бүлүүгэ: ийэ тыл, үйэлээх үгэс, уопсастыба» диэн XII билим-методическай өрөспүүбүлүкэтээҕи кэмпириэнсийэ үөрүүлээх арыллыыттан уонна улахан сугулаантан саҕаланна. Сугулааҥҥа өрөспүүбүлүкэбит уонна улууспут салалтатыттан, олоҥхо сайдыытыгар туруулаһар тумус туттар дьоннорбут уонна 17 улуус талааннаах дьоно-сэргэтэ кыттыыны ыллылар.
Сүбэ мунньаҕы Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы, XV өрөспүүбүлүкэтээҕи Олоҥхо ыһыаҕын тэрийэр кэмитиэт бэрэссэдээтэлэ Сергей Местников уонна Үөһээ Бүлүү улууһун баһылыга, Олоҥхо ыһыаҕын тэрийэр кэмитиэт бэрэссэдээтэлин солбуйааччы Владимир Поскачин салайан ыыттылар. Сугулааҥҥа Олоҥхо ыһыаҕын тэрийэн ыытыыга санаалар, Олоҥхо ыһыаҕа өрөспүүбүлүкэ сайдыытыгар суолтата, дьоҥҥо-сэргэҕэ дьайар күүһэ диэн уонна да атын бүтүн саха норуотун долгутар тиэмэлэр тула кэпсэттилэр.
Онтон Кэнтик нэһилиэгэр бу күн «ЧАП УУС» диэн өрөспүүбүлүкэтээҕи төрүт удьуор уустар күрэхтэрэ ыытылынна. Бу күрэх тимир уустар төрүт үгэстэрин, ньымаларын сөргүтэр, тимири уһаарар идэлэрин култуурунай сыаннас быһыытынан тилиннэрэр, саҥа хайысхалары көрдөөһүн быһыытынан быйыл бэһис төгүлүн ыытыллар.
Уустар күрэхтэригэр күөн көрсө Сахабыт сирин 8 улууһуттан, ол иһигэр Мэҥэ Хаҥаластан, Намтан, Хаҥаластан, Кэбээйиттэн, Сунтаартан, Ньурбаттан, ыаллыы Бүлүү улууһуттан уонна Үөһээ Бүлүүттэн барыта 62 тимир ууһа кэллэ. Тэрээһин саҕаланыытыгар уустар уран оҥоһуктарыттан быыстапка, атыы-эргиэн тэрилиннэ. Кэлбит дьон сөбүлүү көрбүт хомустарын, быһыччаларын, саха быһаҕын атыылаһан үөрдүлэр, астыннылар. Көрдөрүүгэ турбут оҥоһуктар, хомустар, кыптыйдар дьүүллүүр сүбэнэн сыаналаннылар. Саха Өрөспүүбүлүкэтин Ил Дархана Айсен Николаев 50 000 солк., улуус баһылыга Владимир Поскачин 40 000 солк., Кэнтик нэһилиэгин баһылыга Валерий Николаев 30 000 солкуобай уу харчынан туруорбут бириистээх «Бастыҥ аанньыы» күрэҕэр 40 киһи илин-кэлин түһүстэ. Манна 3 ойбону кыттааччылартан саамай быһыйдык алларан, Мэҥэ Хаҥаластан Николай Дьячковскай кыайыылаах үрдүк аатын сүктэ. ⠀
Аны сайын Олоҥхо ыһыаҕар Кэнтик нэһилиэгин Чап уус түһүлгэлэригэр эмиэ бар дьону түмэр араас кэрэхсэбиллээх күрэхтэр ыытыллыахтара диэн эрэнэбит.
Татьяна Потапова, Үөһээ Бүлүү
© edersaas.ru сайтан: https://edersaas.ru/ee-b-l-olo-ho-y-ya-yn-iitinen-bastaky-ulahan-t-lge/