Киһи барахсан – Айыы аартыгын арыйан, күн суолун тутуһан орто туруу бараан дойдутугар – күн сиригэр “мутугунан быраҕар муҥур үйэтигэр” өйүнэн-санаатынан тугу эрэ ыйдаҥардан сырдатаары, илиитинэн-атаҕынан тугу эмэ оҥороору, туһалаары, кэнэҕэс кэлэр кэнчээригэ кэскиллээҕи, үүнэр көрүөнэҕэ үйэлээҕи айан хааллараары олорор буоллаҕа эбээт…
Ытык киһибит, күндү учууталбыт, үтүө сүбэһиппит –
Никандр Прокопьевич!
Эн кэссиэ, кэрэмэс киһи аатын үрдүктүк тутан олорор олоҕуҥ, үлэлиир үлэҥ усталаах-туоратыгар сахаҥ дьонугар сардаҥалаах күнү сандаардаары оспот олук үктээн, дириҥ далай түһүлгэни түстэһэн, уйулҕа уолбат ойбон уйгутун олохтоһон киһи хоодуота, быстыбат бырдалааҕа, эстибэт сэниэлээҕэ, сылайбат сындааһыннааҕа буолан тиийэн кэллиҥ.
Бүгүн аҕыс-иилээх-саҕалаах аан ийэ дойдуга анаан-ааттаан айыллан төрөөбүт алгыстаах АҔЫС УОН АХСЫС хааргын алаһалаан олорор күҥҥэр тоҥтон толлубатах, ириэнэхтэн иҥнибэтэх толуу, туруу дьоммут ытык ааттарыгар Эн үрдүк, үтүө ааккын эмиэ кытыаран айхаллыыр аньыы буолбата буолуо. Бу уһун сылларга үөл талах курдук эриллэн, иирэ-талах курдук имиллэн муора далай сырдык санааҥ муҥурдаммакка төрөөбүт Сунтааргар, Сахаҥ сиригэр төлкө түстэһэн төһөлөөх оҕону, ыччаты иитэн-үөрэтэн, быйаҥы уһансыҥ, иллээх-эйэлээх буолуҥ, өйөһүҥ диэн сиэри ситэрэн, туому толорон, уһуйан-такайан олох суолугар үктэннэрбитиҥ буолуой?!
Ити даҕаны иһин, Эн олорор олоҕуҥ суола суолдьут буолан, оллоонноон олорон олоҥхо номоҕо оҥостон олоҥхолуур олоҥхоҥ оспот олук буолан Сахабыт сирин хас саха тыллаах киһитин,ыллам ыалын кэтэһиилээх кэрэ тыл кэрэһитэ, күүтүүлээх үтүө тыл сүбэһитэ, дьоһун доҕоро, “сир түннүгэ” буоллаҕыҥ.
Бу даҕаны иһин, Эн биһиэхэ Айыы киһитин амарах майгытын, саха киһитин сайдам саҥатын дьиҥнээхтик илдьэ сылдьар баай дууһалаах, баай санаалаах энчирээбэт эркээйи буолаҕын.
Ытык-мааны кырдьаҕаспыт, күндү Никандр Прокопьевич!
Эн амарах, албан аатыҥ аартыктары арыйсан, улуу олоҥхобут уран тылын уйгулаһан, өркөн өйүн төлкөлөһөн, тоҕус үйэ тухары дуораһыйа, аҕыс үйэ тухары сириэдийэ, чэчиринэн чэлгийэ туруохтун!
Алгыс баһа сыаланнын! Уруй-туску! Айхал-мичил! Нарын-наскыл!
Олоҥхо тыйаатырын салалтата
Муус устар 6 күнэ 2022 сыл
Дьокуускай куорат