Саха АССР 100 сылыгар аналлаах быыстапкаҕа ыҥыраллар

«Эллэй суолунан. Геокултуурунай уобарастар» («Путь Элляя. Геокультурные образы») диэн мультимедийнэй экспозиция сүрүн соругунан – өрөспүүбүлүкэ 100 сыллаах үбүлүөйүнэн духуобунай уонна бэлитиичэскэй өрүттээх, ону сэргэ үүнэр көлүөнэҕэ дойдуга бэриниилээх буолуу, тапталы иҥэрэр соруктаах ураты быыстапка  «Россия – моя история”  түмэлгэ  буолуоҕа.

Быыстапка устуоруйаны ситимниир, Саха норуота  олоҕун суолун, дириҥ устуоруйатын аныгы цифровой тиэхиньикэнэн уонна ускуустуба классика жанрыгар олоҕуран, көрдөрүүтэ өрөспүүбүлүкэҕэ олохсуйбут норуоттар социальнай-экэнэмиичэскэй, научнай уонна култуурунай таһымнарын туоһута буолуоҕа. Научнай-тэхиньиическэй сайдыы ускуустубаҕа саҥа мультимедийнэй  жанрын бэлэхтиэҕэ.
Ол курдук, манна Эллэй эһэбит саҕаттан күн бүгүҥҥү олохпутугар диэри, саха норуотун олоҕун-дьаһаҕын геокултуурунай уобарастарын көрдөрүөхтэрэ. Саха уус-уран жанрдара тойук, хомус, алгыс, оһуохай холбоһон, ураты сахалыы тыыны биэриэхтэрэ.
Быыстапкаҕа норуот хаһаайыстыбатын ситиһиилэрэ, СӨ литературнай уонна уус-уран айымньыларын,  хотугу норуоттар төрүт уонна аныгы куукуналарын презентацията ыытыллыаҕа. Быыстапка уус-уран салайааччытынан РФ норуодунай артыыһа, РФ үтүөлээх деятелэ Андрей  Борисов буолар. Бырайыак ааптара – Ариан Ермолаев (Арассыыйа дизайнердарын чилиэнэ, СӨ дизайнердарын сойууһун бэрэссэдээтэлин солбуйааччы). Быыстапка сценарийын Анастасия Ермолаева оҥорбут.
Бу туһунан СӨ култуураҕа уонна духуобунай сайдыыга миниистирэ Юрий Куприянов санаатын үллэһиннэ:

— Маннык быһыылаах  «Эллэй суолунан. Геокултуурунай уобарастар» диэн Саха АССР 100 сылыгар анаммыт мультимедийнэй быыстапка өрөспүүбүлүкэҕэ аан бастакытын ыытыллар. Бу бырайыакка биһиги уруккубутун уонна инникибитин саҥа цифровой технологиянан ситимниибит. Бу ураты быыстапка оҕолор, ыччат дьон болҕомтотун, ону сэргэ аҕам саастаах көлүөнэ интэриэһин тардыаҕа диэн эрэнэбин. Норуоппут өрөспүүбүлүкэбит устуоруйатын быыһын сэгэтэн, уруккуну уонна аныгыны ситимниир эйгэни тыыннааҕымсытан көрүөҕэ. Онон киин куораппыт олохтоохторун уонна ыалдьыттарын ыҥырабыт.

Бэлиэтээн эттэххэ, быыстапка үөрүүлээх аһыллыыта муус устар 27 күнүгэр сарсыарда 10 чаастан буолуоҕа.

Ульяна ЗАХАРОВА.

Геокултуурунай сайдыы институтун тус архыыбын хаартыскалара туһанылыннылар.

Источник