Сэдэх экспонаттардаах Исидор Барахов мусуойугар

Саха сирэ автономнай өрөспүүбүлүкэ буолбута биир үйэ буолла. Бу кэрэ-бэлиэ түгэн туһунан «Известие» хаһыакка 1922 сыл ыам ыйын 10 күнүгэр Саха АССР тэриллиитин туһунан БСКСК УУРААҔА тахсыбыта.
Дьэ, бу устуоруйа сүҥкэннээхэй чахчытын бигэргэтэр хаһыат Үөһээ Бүлүүгэ Харбалаахтааҕы Барахов аатынан мусуой саҥа экспоната буолла. 100 сыл анараа өттүгэр бэчээттэммит «Известие» хаһыаты күн бүгүҥҥэттэн мусуой ыалдьыттара кэлэн көрүөхтэрин сөп.

И.Н.Барахов аатынан мусуой үлэһитэ Евдокия Павловна Семенова улуу киһи төрөөбүт-улааппыт дьиэтигэр экскурсиялатар, сиһилии кэпсиир-ипсиир. Кини кэпсииринэн, бу дьиэни Балаҕаннаах диэн сиртэн көһөрөн аҕалбыттара. Бараховтар бары тула олорон аһаабыт-сиэбит аҕай остуоллара, олох мастара, алтан сылабаардара, иһиттэрэ-хомуостара көрдөрүүгэ тураллар. Ону тэҥэ, олохтоохтортон хомуллубут былыргы маллар-саллар бааллар, оччотооҕу дьиэ ис бараанын сөргүппүттэр. 19-с үйэ бүтэһигэр баай ыал алаһа дьиэтигэр киирэн кэлбит курдук буолаҕын. Бараховтар дьиэлэрэ билигин да бөҕө-таҕа, киэҥ, үрдүк өһүөлээх, чиргэл эбит.

Ону тэҥэ, Исидор Никифорович олоҕун, үлэтин-хамнаһын кэпсиир истиэндэлэр, хаартыскалар, сэдэх кинигэлэр, докумуоннар бааллар.
Эһиил өрөспүүбүлүкэ төрүттэниитигэр сүҥкэн өҥөлөөх И.Барахов төрөөбүтэ 125 сылыгар кини төрөөбүт дойдутугар 2 этээстээх, тупсаҕай көстүүлээх аарыма уораҕай дьэндэйиэ. Бүгүн бастакы сыбаайатын түһэрэригэр ол туһунан Ил Дархан эрэннэрдэ.

Суруналыыс Ангелина Васильева видео-устуутун көрүҥ. Мусуой үлэһитэ Евдокия Павловна Семенова улуу киһи төрөөбүт-улааппыт дьиэтигэр экскурсиялатар.

Үөһээ Бүлүүттэн Ангелина Васильева, «Саха сирэ» хаһыат, edersaas.ru
Хаартыска: ааптар түһэриитэ.