“Олоҥхо баттл” муҥутуур кыайыылааҕа, мөлүйүөн аҥара суумма хаһаайката Чурапчыттан – Анастасия Алексеева

Хайа даҕаны омук сайдарыгар, үүнэн-үрдээн тахсарыгар кирилиэһин маҥнайгы үктэлэ – норуот олоҥхото, ырыата-тойуга уонна биллэн туран төрүт үгэһэ буолар. Бэҕэһээ о.э. алтынньы 22 күнүгэр “Саха” НКИХ киэҥ түһүлгэтигэр, аан бастакытын аһаҕас биэриигэ эдэр ыччат олоҥхоһуттарыгар аналлаах “Олоҥхо-баттл” күрэх муҥутуур кыайыылааҕын быһаардылар.

Бырайыагы СӨ Тас сибээскэ министиэристибэтэ уонна Өксөкүлээх Өлөксөй аатынан норуоттар доҕордоһууларын дьиэтэ үбүлээтилэр. Олоҥхону өйүүр эйгэ кэҥээн иһэрэ билиҥҥи ыччат норуот тылынан уус-уран айымньытын өрө тутара итиэннэ Улуу олоҥхоһуттарбыт сурукка хаалларбыт айымньылара үйэтитиллэрэ олус кэрэхсэбиллээх суол буолар.

Күрэх саҕаланыаҕыттан өрөспүүбүлүкэ араас муннуктарыттан 10-ча ыччат: Сайыына Шамаева, Вера Цыпандина, Никита Аянитов, Анастасия Алексеева, Станислав Иванов, Альберт Шестаков, Айталина Крылова, Алексей Шамаев, Сайаана Попова уонна Хаарчаана Семенова кэлэн кыттыыны ыллыллар.

Дьүүллүүр сүбэҕэ Былатыан Ойуунускай аатынан Судаарыстыбаннай бириэмийэ лауреата, тыл билимин хандьыдаата, СӨ култууратын үтүөлээх үлэһитэ, Олоҥхо тыйаатырын иһинэн үлэлиир “Олоҥхо” киинин салайааччыта

Агафья Захарова, СӨ Ыччат бэлиитикэтин туйгуна, СӨ култууратын туйгуна, Арктикатааҕы култуура уонна ускуустуба Судаарыстыбаннай үнүстүүт уус-уран култуураҕа кафедратын сэбиэдиссэйэ, култуура билимин хандьыдаата Зоя Стрекаловская, Максим Аммосов аатынан ХИФУ олоҥхону чинчийэр үнүстүүт дириэктэрин эбээһинэһин толорооччу Руслан Анисимов үлэлээтилэр.

Ити курдук киһи-аймах айан хаалларбыт тулхатыйбат баайа, чулуу айымньыта билиҥҥи көлүөнэ ыччаты кытта тэбис-тэҥҥэ хардыылаан, сайдан, үрдээн иһэрэ биһигини олус үөрдэр уонна саха киһитин кутугар-сүрүгэр иҥэн сылдьар туоһута буолар.

Санатан эттэххэ 2005 сыллаахха Саха олоҥхотун ЮНЕСКО – Киһи-аймах чулуу айымньытынан быһыытынан ааттаабыта. Тылы чинчийээччилэр Иван Худяковтан, Эдуард Пекарскайтан саҕалаан олоҥхону үөрэтии, чинчийии үлэтэ күүскэ ыытыллар. Отут алта тыһыынча строкалаах “Дьулуруйар Ньургун Боотур” о.д.а. олоҥхолорбут араас омук тылыгар тылбаастаммыттара.

Тыл күүһүнэн айыллыбыт сүдү айымньыбыт олоҥхо толоруутугар бэҕэһээҥҥи финалга түөрт ыччат тахсан кытынна. Бастакы түһүмэххэ кыттааччылар хомуур олорон олоҥхолорун толордулар. Иккис түһүмэххэ биһиги кыыспыт Анастасия Алексеева, Прокопий Ядрихинскай-Бэдьээлэ “Дьырыбына Дьырылыатта” олоҥхотуттан быһа тардан иһитиннэрдэ.

ЫСПАРААПКА

Анастасия Алексеева – Чурапчы улууһун Чакыр нэһилиэгиттэн төрүттээх, 23 саастаах, иллэҥ кэмигэр гитараҕа оонньуур, ырыа тылын суруйар, биэс сааһыттан олоҥхо баай тылын:өһүн, остуоруйатын, ырыатын үөрэтэр. “Олоҥхо ыһыаҕын” хас да төгүллээх кыттыылааҕа, төрүттэригэр биллэр норуот уус-уран айымньытын тарҕатааччылара, толоооччулара олорон ааспыттар. Олоҥхоҕо уһуйааччыта – ийэтэ Зинаида Алексеева буолар. Анастасия билигин Олоҥхо тыйаатырын артыыһа. Эдэр толорооччу биэрии маҥнайгы чааһыгар уоттаах-күөстээх аныгы ньыманы туһанан олоҥхону толорон көрөөччүлэр улахан биһирэбиллэрин ылбыта.

Дьүүлүүр сүбэ уопсай түмүгүнэн: Станислав Иванов 186 баалы итиэннэ 477 смс куолаһы хомуйда, Альберт Шестаков 167 баал, 423 смс куолас уонна муҥутуур кыайыылаах Анастасия Алексеева 197 баалы, Чурапчы олохтоохторуттан 672 смс куолаһы хомуйда.

Подробнее: https://xn--80aa7aggbp2b.xn--p1ai/article/76091