Нам улууһун Түбэ нэһилиэгэр, Олоҥхо декадатын чэрчитинэн, өрөспүүбүлүкэтээҕи «Муҥха олоҥхото» — ыччат бэстибээлэ буолан ааста.
Быйылгы бэстибээл олоҥхоһут Егор Охлопков-Буоратай төрөөбүтэ 125 сылыгар ананна. Ыччат ортотугар олоҥхо толорооччулар бэстибээл бырайыак СӨ культуратын үтүөлээх үлэһитэ Зоя Сысолятина көҕүлээһининэн, күрэх өр сылларга өрөспүүбүлүкэ араас улуустарыгар ыытыллан кэллэ.
Түбэ маанылаах сиригэр-уотугар Дьааҥыттан, Үөһээ Бүлүүттэн, Бүлүүттэн, Уус Алдантан, Тааттаттан, Чурапчыттан, Мэҥэ Хаҥаластан, Намтан эдэр олоҥхоһуттар кыттыыны ыллылар. Үөрүүлээх түгэн ыалдьыттарын көрсүү Түбэ нэһилиэгин кыраныыссатыгар турбут собо бэлиэтин көрдөрүүттэн саҕаланна.
Түбэ нэһилиэгин биир ураты күөлүгэр “Муҥха олоҥхото” күрэс дьүүллүүр сүбэтэ, кыттааччылар муҥха сиэригэр-туомугар кыттыһан үөрэн-көтөн кэллилэр. Мунха алгыһын Аскалон Егоров-Өркөн Дьол түстээтэ.
Икки күннээх бэстибээл түмүгүнэн Муҥутуур кыайыылааҕынан Нам улууһун Таастаах нэһилиэгиттэн төрүттээх, Аграфена Макарова аатынан Дьокуускайдааҕы култуура уонна искусство колледжын студена Назар Филиппов ааттанна. Кини П.П. Ядрихинскай-Бэдьээлэ “Дьырыбына Дьырылыатта кыыс бухатыыр” олоҥхотун толордо.
Дьүүллүүр сүбэ бэрэссэдээтэлинэн СӨ Олоҥхо киинин научнай-методическай үлэҕэ уонна тас сибээскэ сүрүннүүр специалиһа Зоя Сысолятина үлэлээтэ. Кинини тэҥэ, эдэр олоҥхоһуттары Хотугу норуоттар институттарын научнай сотруднига Анна Данилова, Дьокуускайдааҕы култуура уонна искусство колледжын этнокултуураҕа кафедратын салайааччыта Мария Боппоенова, СӨ Олоҥхо киинин научнай-методическай үлэҕэ уонна тас сибээскэ сүрүннүүр үлэһитэ Ульяна Флегонтова сыаналаатылар.
Бэстибээл анал ыалдьыттарынан 2019 с. Нам улууһугар ыытыллыбыт Олоҥхо ыһыаҕын ыччаттарга күрэһин кыайыылааҕа Петр Попов уонна 2018 с. “Муҥха олоҥхотун” муҥутуур кыайыылааҕа Вера Цыпандина буоллулар.
Күрэх үөрүүлээх аһыллыытын «Түбэ нэһилиэгэ» МТ, баһылык Константин Федоров, «Айхал» сынньалаҥ киин, дириэктэр Дария Попова, режиссер, СӨ культуратын туйгуна Иван Новиков тэрийэн ыыттылар.
«Муҥха олоҥхото» бэстибээл кыттыылаахтарыгар, ыалдьыттарыгар, Түбэ нэһилиэгин дьоно-сэргэтэ муҥха үтүө үгэһинэн көмүс хатырыктааҕынан күндүлээтилэр.
Сахабыт өрөспүүбүлүкэтэ дьоллоох олоҕо чэчирии-чэлгийэ сайдарын, кэскилэ үрдүү турарын туһугар өссө да эстибэт эрчиминэн, сылайбат сындааһынынан айымньылаахтык үлэлиэххэ, атыттарга үтүө холобур буолуохха!
СӨ культуратын туйгуна М.А. Сивцева «Ытык Эбэбит – Үрүҥ Күөл бэлэҕэ» бырайыагын чэрчитинэн, модельнай библиотека сэбиэдиссэйэ Л.С. Григорьева «Олоҥхо алыптаах аартыгар» кинигэ, тарбахтарыгар талааннаах далбар хотуттарбыт Г.К. Куличкина, С.Г. Готовцева, Е.И. Шарина оҥоһуктарын, Нам улууһун П.П. Ядрихинскай-Бэдьээлэ аатынан Олоҥхо дьиэтин куукулаларын быыстапката туран кэрэхсэттэ. Сылаас тотоойу аһынан кэлбит ыалдьыттары күндүлээтилэр: М.Е. Охлопкова аатынан Түбэ орто оскуолата, дириэктэр Е.И. Шарина, бэтэрээннэр сэбиэттэрэ, салайааччы М.П. Сивцева, «Алгыс» балаҕан, салайааччы А. И. Куприянова, нэһилиэкпит тэрилтэлэрэ, түөлбэлэрэ, спонсор Уруйдаах Айтыына-Дьол кыыһа бу тэрээһин үрдүк таһымнаахтык ааһарыгар күүс-көмө буоллулар.
Ону таһынан, Нам улууһун баһылыгын солбуйааччы П.В. Абрамовка, «Нам улууһа» култуураҕа уонна духуобунай сайдыыга управлениетын начальнигар Е.А. Заровняеваҕа, Нам улууһун П.П.Ядрихинскай-Бэдьээлэ аатынан Олоҥхо дьиэтин дириэктэригэр В.В. Колпашниковаҕа уонна Бөтүҥ нэһилиэгин С.П.Оконешников аатынан «Айылгы» култуура киинин дириэктэригэр И.С. Винокуроваҕа, тэрээһин ыытылларыгар күүс-көмө буолбут кэрэ эйгэни өйүүр дьоммутугар барҕа махтал.