Сергей Местников, СӨ бырабыытылыстыбатын бэрэссэдээтэлин солбуйааччы:
Олоҥхо эйгэтэ тус бэйэбэр сыһыана — хос эһэм Андрей Гаврильевич Местников (I Өлтөх, Уус Алдан), “Бардам Баабый” олоҥхото РНА СС Гуманитарнай чинчийии институтугар харалла сытарын быйыл күһүн билэммин, тиийэн тутан-хабан көрбүтүм. Инникитин бу үлэни үйэтитэр, киэҥ араҥаҕа таһаарар соруктаахпын.
Дьулустаан Бойтунов, худуоһунньук, СӨ култууратын туйгуна, ускуустубатын үтүөлээх үлэһитэ, Худуоһунньуктар Арассыыйатааҕы Академияларын чилиэн-кэрэспэдьиэнэ:
Олоҥхо ааҕан саха тылын баайыттан астынабын-дуоһуйабын. Киһини ыга толкуйдатар. Уонна чэбдик турукка киллэрэр ураты күүстээх.
Гаврил Андросов, бэйиэт, Саха Сирин уонна Арассыыйа суруйааччыларын Сойууһун чилиэнэ, “Чолбон” сурунаал бас эрэдээктэрэ: Олоҥхо миэхэ өбүгэни кытта ситимнээх – Ондуруоһаптар, Чээриттэр олоҥхоһут, сээркээн сэһэн дьон олорон ааспыттара. Олоҥхоһуттар урукку кэмҥэ ыалы кэрийэ сылдьан олоҥхолуур, түптээн-таптаан олорбот, эрээри норуот муудараһын илдьэ сылдьар дьон диэн өйдөбүл баар, аан дойдуга барытыгар хаамайы, хас биирдии омукка кэрийэ сылдьан ыллыыр-туойар, сэһэргиир араҥа баарын курдук. Онон олоҥхоһут саха үгэһин тута сылдьыбыт сир түннүктэрин, сээркээн сэһэнньиттэри кытта быһаччы ситимнээх. Олоҥхо түҥ былыргыны кытта кэлэр кэскили ситимниир, норуот туох баар билиитин барытын түмпүт, сүрдээх элбэх өрүттээх матрица. Олоҥхоһут өбүгэлэрдээх буоламмын саха уус-уран тылыгар, литературатыгар, духуобунаһыгар үлэлии сылдьабын диэн өйдүүбүн.
Екатерина Ноговицына, Дьааҥы улууһун дьокутааттарын Сэбиэтин бэрэссэдээтэлэ: Олоҥхону аан бастаан сурукка, наукаҕа киллэрии (И.А.Худяков) Дьааҥы сиригэр төрүттэмитинэн, төрүт олохтоох буоларым быһыытынан киэн туттабын. Дьааҥы ийэ олоҥхоһута Д.Томская-Чаайка Японияҕа олоҥхо толорбутун кэннэ ЮНЕСКО киһи-аймах култуурунай нэһилиэстибэтин быһыытынан билиммитэ. Уонна Дьааҥыга Олоҥхо ыһыаҕын тус бэйэм тэрийсибиппиттэн сүрдээҕин үөрэбин, киэн туттабын.
Айыына Прибылых, Национальнай библиотека Медиакиинин үлэһитэ: Олоҥхо диэн мин санаабар саханы саха оҥорор духовнай сайдыы чыпчаала. Холобур, олоҥхо сюжетын эрэ буолбакка, ону таһынан тылын-өйүн уонна философиятын өйдөөбүт киһи өйө-санаата атыннык аһыллар уонна ис туруга бөҕөргүүр дии саныыбын.
Прокопий Иванов, Олоҥхо тыйаатырын администратора, продюсер, киинэ артыыһа:
Олоҥхоҕо саха баардааҕа барыта баар – итэҕэлэ, философията, бэл, успуорда кытары.
Леонид Иванов-Лүҥкүр, Олоҥхо тыйаатырын тыас-уус режиссера, Дапсы бөлөх мусукаана:
Тойук уонна да атын фольклор бары жанрдара олоҥхону үөскэппиттэр диэн санааҕа кэлэбин. Аан дойду омуктарын итэҕэллэрин ( ислам, буддизм уо.д.а.) уопсай өйдөбүллэрин эмиэ олоҥхоттон булуохха сөп.
Герасим Тарабукин, хомус ууһа: Олоҥхо дойдута чараас эйгэни кытта сибээстээх. Саха олоҕун сырдык, үтүө өттүн хоһуйан этиллэр.
Мария Турантаева, Олоҥхо тыйаатырын дириэктэрэ:
Олоҥхо диэн –
Көстүбэти көрдөрөр,
Иһиллибэти иһитиннэрэр,
Кэрэни кэрэхсэтэр,
Үтүөнү үксэтэр
Олохпут оҥоһуута.