Сыл түмүктэрин таһаарыы чэрчитинэн Дьокуускай куорат дьаһалтатын култуураҕа уонна духуобунас сайдыытыгар управлениетын Хатас уокуругунааҕы норуот айымньытын киинин «Тускул» КК сылын аайы ыытыллар «Көмүс кынат» диэн ааттаах тэрээһиҥҥэ анал ааттары туттарыы буолла. «Махталлаах буолуу, сиэрдээх буолуу» диэн үйэтитиигэ тиэрдэргэ быстыспат өйдөбүллэринэн сиэттэрэн ыытыллар тэрээһин 2015 сылтан сылын аайы ыытыллар.
Быйылгы сылга «Бастыҥ таһаарыылаах үлэ», «Ситиһиигэ сирдээччи», «Бастыҥ бырайыак», «Бастыҥ меценат» , «Кэрэ эйгэ кэрэһитэ, «Бастыҥ айар кэлэктиип», «Сырдык сыдьаайа», «Төрүт иис кистэлэ», «Талба талаан», «Дьүөрэл», «Тирэх», «Дайар кынат», «Бэриниилээх буолуу» , «Эрэл», «Үрдэл» уо.д.а. анал ааттар туттарылыннылар, ол иһигэр «Төлкөлөөх өйөбүл” анал аат Олоҥхо театрыгар ананна. «Төлкөлөөх өйөбүл» — Төрөөбүт тылбыт сүөгэйин, сүмэтин эҕирийбит, ийэ тылбыт иһирэх иэйиитин иҥэриммит, ойуулуур тыл бастыҥа киирбит, тохтообокко тохтор толуу, сайыннарар өттүгэр салайар, сайаҕас, сайдам тыллаах, туллубат тулааһыннаах, хамсаабат акылааттаах, өһүллүбэт өһүөлээх тыллаах, омук дьонуттан уратыбыт — олоҥхолоохпутун 2022 сыл дьиҥ чахчы илэ-бааччы көрөн итэҕэйдибит, итэҕэттибит. Олоҥхону туруоруу манан аҕай буолбатах дьыала буоларын бары да өйдүүбүт, онон манна көмө-тирэх, сүбэ-соргу буолбут Мария Васильевна Турантаева салайыытынан үлэлиир -хамсыыр «Олоҥхо театра» бу ааты ылла – диэн суруйда Наталья Руфова.
“Кулун кугас аттаах Куллустай Бэргэн” Сергей Зверев-Кыыл Уолун олоҥхотунан испиктээкили туруоруу кураторынан театр специалиһа Валентина Постникова, туруорааччы худуоһунньугунан театр артыыһа Валерий Саввинов таһаарыылаахтык үлэлээбиттэрэ. Эҕэрдэлээн кэбиһиэҕиҥ!