СУНТААРГА ОЛОҤХО ТЫЙААТЫРА
Олунньу 1-2 күннэригэр Сунтаарга СӨ судаарыстыбаннай сүбэһитэ Андрей Саввич Борисов уонна «Олоҥхо» тыйаатыра ыалдьыттаатылар. Андрей Борисов сүрүн соругунан Өрөспүүбүлүкэҕэ баар олоҥхо дьиэлэрин биир ситимҥэ киллэрии диэн ис хоһоонноох кэпсэтиини олохтоото. Олоҥхо тыйаатыра Степанида Борисова режиссердаах «Кыыс Дэбилийэ» олоҥхотун көрдөрдүлэр. Көрөөччүлэр олоҥхону аныгылыы тэтиминэн көрүөххэ сөп эбит диэн сыаналаатылар. Билиэттэр Пушкинскай каартанан атыыламмыт буолан элбэх оскуола үөрэнээччилэрэ кэлэн көрбүтэ кэрэхсэбиллээх. Таҥас-сап, сыана киэргэтиитэ, артыыстар көстүүмнэрэ барыта ураты, сонун. Сүрүн оруолу толорбут «Олоҥхо батл» кыайыылааҕа Анастасия Алексеева — Кыыс Дэбилийэни олус табыллан, арыллан оонньоото. Көрөөччүлэр ытыс тыаһынан махтаммыттарын биллэрдилэр. Оҕолорго «Дьорҕостой Бэргэн» режиссер Гаврил Менкяров куукуланан олоҥхолоругар 450 оҕо сырытта. Төрөппүттэр, учууталлар, оҕолор бары үөрэн-көтөн, сөҕөн махтайан тарҕастылар. Сунтаардар өссө да Олоҥхо тыйаатырын айанын күүтэ хааллылар. Онтон Андрей Борисов Сунтаар, Элгээйи нэһилиэктэригэр «Түмүү» диэн суолталаах мунньах тэрийдэ, Арчы дьиэтигэр алгысчыттары кытта көрүстэ. Маны таһынан Олоҥхо тыйаатыра, Хомус түмэлэ тойукка, хомуска, кырыымпаҕа маастар-кылаастары тэрийдилэр.
Мира Афанасьева
https://youtu.be/-nwzS9k2IGE
ТОЙБОХОЙТОН, ДЬААРХАНТАН АЙАР КИЭҺЭЛЭР
Бээтинсэ, субуота күн Сибиэрэп аатынан УНАК улууспут муусука, ырыа эйгэтигэр ааттаах дьоммут дьоро күннэрэ тосхойдо. Олунньу 3 күнүгэр Тойбохойтон Иван Иванов салайааччылаах тыыннаах оркестр көһөн киирэн умнуллубат үтүө түгэн үүннэ:
https://kultura-suntar.saha.muzkult.ru/news/90570808
Онтон сарсыныгар Дьаархантан Вячеслав Тимофеев 55 сааһын бэлиэтээн кииҥҥэ улахан кэнсиэр тэрийдэ. Бу дьоро киэһэҕэ биир дойдулаахтара үгүстэрэ киирэн айар киэһэни киэргэттилэр.
НЬУРГУҺУННАР ТОЙБОХОЙГО
Айар куттаах күндү дьоммут «Ньургуһун» литературнай түмсүү кыттыылаахтара Тойбохойго Бессонов аатынан түмэли көрөн-истэн, «Хочо кыымнара» түмсүү дьонун кытта ирэ-хоро кэпсэтэн, айар куттаахтар маньыйа айымньыларын ааҕан, санаа атастаһан киирдилэр.
СИБИЭРЭП КИИНИН СИТИҺИИТЭ
Бу күннэргэ Саха Өрөспүүбүлүкэтэ Олоҥхо дьиэлэрин сайыннарар, дьиэлэрин-уоттарын тупсарар сыаллаах субсидиятын кыайыылаахтара билиннилэр. Ол иһигэр биһиги Сибиэрэппит аатынан УНАК 5 мөл. 210 тыһ.солк. ситистэ. Эҕэрдэ!
БУУЛДЬАНАН ЫТЫЫ
Буулдьаннан ытыыга 21 саастарыгар диэри Россия Первенствотыгар Сунтаардааҕы олимпийскай эрэллэри бэлэмниир оскуола иитиллээччитэ Ераскумова Виктория үс буолан ытыыга үрүҥ көмүс мэтээли ылары ситистэ, тренерэ Светлана Николаева.
ТУЙААРА КУЧУ ЧЭЙЭ
«Чайная культура Евразии» бырайыак үлэтэ күөстүү оргуйар. Билии биһигинэн Туйаара Кучу Казань куоракка тиийдэ. Саха сириттэн үөрэнэ сылдьар оҕолору кытта көрсүһүү тэрийдэ. Алаадьылаах кучу чэйи сыпсырыйан иһэ-иһэ ирэ-хоро кэпсэттилэр. Оҕолор дойдуларын, дьоннорун ахтан, сахалыы саҥаны истээри кэлбиттэр. Тутум үрдээн, саха буолалларынан киэн туттан, сүргэлэрэ көтөҕүллэн тарҕастылар.
СУОЛТАЛААХ КӨРСҮҺҮҮ
Олунньу 1 күнүгэр Сунтаар улууһун баһылыга Анатолий Григорьев, улуус депутаттарын Сэбиэтин бэрэссэдээтэлэ Ульяна Попова, прокурор эбээһинэһин толорооччу Айсен Прокопьев уонна нэһилиэк баһылыктара анал байыаннай дьайыыга барбыт биир дойдулаахтарбыт дьиэ кэргэттэрин кытары көрүстүлэр. Анал байыаннай дьайыыга сылдьар уолаттар дьонноро бэйэлэрин ыйытыктарын биэрдилэр сөптөөх хоруйдары ыллылар. Анатолий Григорьев: «анал байыаннай дьайыыга барбыт уолаттарбыт дьиэ кэргэттэрин кыһалҕаларын туоратар биһиги ытык иэспит» диэн түмүктээтэ. Сүрүн ыйытыыларга тохтоон ааһар буоллахха, байыаннайдар дьиэ кэргэттэрэ уолаттарбытыгар ыытар аспыт-таҥаспыт аадырыһыгар тиийбэт диэн иһитиннэрдилэр. Бүлүүчээнтэн быстах хомуурга барбыт, инбэлиит оҕолоох уолу төттөрү дойдутугар аҕаларга өйөбүл буолуҥ диэн көрдөстүлэр. Ону таһынан, уһун унньуктаах тымныы кыһыммыт элбэх дьиэ кэргэни хаарыйбыт. Онон үгүстэрэ киин ититиигэ холбонор табыллыа дуо, диэн ыйыталастылар. Биир интэриэһинэй ыйытыгынан, бэйэлэрин баҕа өттүнэн, контрагынан уонна быстах хомуурунан барбыт уолаттар туох уратылаахтарый диэн буолла. Онуоха, бэйэлэрин баҕа өттүнэн барбыт уолаттар контрактара бүттэҕинэ рапорт суруйан, төннөн кэлиэхтэрин сөп диэтилэр. Оттон атыттар байыаннай эбээһинэстээхтэр диэн быһааран эттилэр. Манна араас көмөлөрү, ханнык льготанан туһаныахтарын сөбүн кэпсээтилэр. Госуслугаҕа yakutiya диэн саҥа портал оҥоһуллан үлэтин саҕалаата. Манна ким баҕара киирэн көмөлөр тустарынан билиэхтэрин-көрүөхтэрин сөп.
ИДЭ БИЭРЭР КЫҺА СОНУНА
Олунньу 2 күнүгэр Сунтаар технологическай коллеһыгар профориентационнай үлэ чэрчитинэн М.К.Аммосов аатынан ХИФУ Мииринэйдээҕи политехническай институт преподавателлэрин кытары көрсүһүү буолла. Мииринэйтэн сылдьар ыалдьыттар институттарын, кафедраларын, үөрэх, Абитуриент-2023 хампаанньа тустарынан сиһилии кэпсээтилэр, буклеттары түҥэттилэр.
Олунньу 3 күнүгэр Сунтаар улууһун дьарыктаах буолуу киинин дириэктэрэ Александр Николаев, специалист Сардаана Алексеева выпускниктары кытары үлэ туһунан кэпсэтии ыытылар. Быйыл бүтэрэр устудьуоннарга үлэ рыногын вакансияларын кэпсээтилэр, үлэҕэ киирэргэ уонна учуокка турарга сүбэлэри биэрдилэр, үлэ көрдүүргэ эдэр дьоҥҥо наадалаах сүбэлээх-амалаах буклеттары түҥэттилэр.
Александра Павлова
СУРУЙААЧЧЫ СИТИҺИИТЭ
Кириэстээхтэн төрүттээх Александр Амбросьев – Сайылык Уола «Номинанты Российской премии-2022» күрэскэ «Аарыма» айымньытынан кыттан «Лучший писатель года» анал аат хаһаайына буолла. Бу күрэс 2017 сылтан саҕалаан ыытыллар эбит, кыайыылаахтар айымньылара Арассыыйаҕа киэҥник тарҕаммыт «Российский колокол» сурунаалга бэчээккэ тахсар.
СУНТААРГА ҮҮНЭР КӨЛҮӨНЭ ТЫЙААТЫРА
Олунньу ый 10 күнүгэр 17.00ч. Сунтаарга Сибиэрэп аатынан норуот айымньытын киинигэр Алексей Павлов салайааччылаах СӨ үүнэр көлүөнэ тыйаатыра Федор Достоевскай «Хара дьай иэстэбилэ» испэктээгэр бар дьоммутун ыҥырабыт! Касса УЦНТ 10.00-12.00ч., 14.00-17.00ч. диэри үлэлиир. Билсэр нүөмэргит 89142569394.
ХАПСАҔАЙГА СИТИҺИИ
Уһун Күөлтэн Хаҥалас хапсаҕайыгар 57 кг. Данил Аввакумов бастаата! Эҕэрдэ!
ХАННЫК БАҔАРАР ДЬАЙЫЫНЫ ОҤОРУУ ӨЙ-САНАА ТЫЛБААСЧЫТА БУОЛЛАҔА!
Тускулаана, олунньу 6 күнэ, 2023 сыл.