Олунньу 27 күнүттэн кулун тутар 5 күнүгэр Олоҥхо тыйаатырын лектора В.П.Стручков-Дуулаҕа Дьуһаал Дьааҥы улууһугар «Олоҥхо — олохпут олуга» тиэмэлээх лекция-көрсүһүүлэри ыытта. Көрсүһүүлэр улуус биэс нэһилиэгэр, улуус киинигэр Баатаҕайга уонна Дьааҥы кырдьаҕас куоратыгар ыытылыннылар. Табалаахха, Адыаччыга, Суордаахха, Дуулаҕалаахха, Боруулаахха, Верхоянскай куорат музейыгар оскуола оҕолорун, учууталлары, култуура эйгэтин үлэһиттэрин, актыбыыстары кытта сүрдээх дириҥ ис хоһоонноох кэпсэтиилэр буоллулар. Дьааҥы сирэ Олоҥхо биир көмүс ньээкэ уйата буоларын быһыытынан туруктаах кэпсэтиилэр тахсыбыттарын лектор бэлиэтиир.
Баатаҕай орто оскуолатыгар учууталлар олунньутааҕы мунньахтарыгар, Оҕо киинигэр саха тылын билиҥҥи туругун, тыл харыстабылыгар хамсааһын туһунан тыл-өс этилиннэ.
Кулун тутар 2 күнүгэр Виктор Павлович үөрэммит-иитиллибит, үлэлээбит, салайбыт Дуулаҕалаахтааҕы орто оскуолатын 95 сыллаах үбүлүөйүгэр сырытта, эҕэрдэ тылын эттэ. Улуус дьаһалтатын баһылыга В.М.Ивановка, үөрэҕирии, култуура салайааччыларыгар У.А.Шишигинаҕа, И.Ю.Рязанскаяҕа, В.Н.Мишуковка, В.А.Колесовка, Олоҥхо тыйаатырын дириэктэрэ М.В.Турантаеваҕа тэрээһини салайыы иһин барҕа махталбытын тиэрдэбит.