Өймөкөөн Үчүгэйигэр Олоҥхо ыһыаҕар бэлэмнэнии

Быйыл «Айыы санаа айана» Олоҥхо ыһыаҕа Өрөспүүбүлүкэҕэ XVI-с төгүлүн от ыйын 1-2 күннэригэр Өймөкөөн улууһугар Томтор нэһилиэгэр «Көмүс күрүө» ди­эн сиргэ ыытыллар.​ Олоҥхо ыһыаҕын уус-уран салайааччыта, сүрүн режиссера Андрей Бори­сов.

Кулун тутар 22 күнүгэр Мария Турантаева салайааччылаах Олоҥхо ыһыаҕын туруорар режиссерскай бөлөх ааттаах айанньыт Дугуйдаан Винокуров дойдутугар Үчүгэй нэһилиэгэр үлэлээтэ.

Бөлөх састааба — режиссер көмөлөһөөччүлэрэ Павел Колесов, Василиса Алексеева, сценарист консультана Виктор Стручков, сүрүн худуо­һунньук көмөлөһөөччү­тэ Валерий Саввинов, таҥас-сап худуоһуннь­угун көмөлөһөөччүтэ Зинаида Максимова, РПГ координатора Мария Григорьева.

Сарсыарда Хотугу аҕыйах ахсааннаах төрүт омуктар үгэстэрин, түһүлгэлэригэр болҕомто ууран, норуот көхтөөх кыттыытын тэрийэн, нэһилиэнньэ ортотугар дьон өйүн-санаатын түмэр элбэх өрүттээх, дириҥ суолталаах, тэрээһиннээх көрсүһүү буолла.

Мунньах кэннэ нэһилиэк»Тугутчаан» оҕо уһуйааныгар сылдьан уһуйаан иитиллээччилэрэ олоҥхолуулларын, ыллыылларын-үҥкүүлүүллэрин истэн-сэргээн сөҕө махтайдылар.

Оскуолаҕа Пушкинскай карта туһунан, хайдах, туохха тутталларын сиһилии кэпсээтилэр. Оҕолор ыалдьыттары «Һээдьэҕэ» үөрэтэн, тэҥҥэ үҥкүүлээн ыллылар.

Күн түмүгэр кэнсиэргэ кыттааччылар талааннарын сыаналаатылар. Эдэр ыччаттар үҥкүүнэн дьоро күнү киэргэттилэр.

Кэлбит дьон бары сиэри-туому ситэрэн арыылаах алаадьынан күндүлээтилэр. Олохтоохтору кытта атах тэпсэн олорон аны сайын ыһыллыахтаах Олоҥхо Ыһыаҕын тэрээһинин тула хоннохтоох кэпсэтии кэмигэр, олохтоохторго хомуска маастар кылааһы Вероника Лыткина ыытта. Виктор Стручков олоҥхо ис тутулун, сыалын-соругун, саха халандаарын туһунан лиэксийэ оҥордо.