Кулун тутар 24 күнүгэр Өймөкөөн улууһун Сордоҥноох нэһилиэгэр Олоҥхо ыһыаҕын тэрийэр режиссерскай бөлөх үлэлээтэ. Ыһыах сценарийынан хайдах быһыылаахтык ыытыллыаҕын, өссө туох ирдэбиллэр киирэллэрин кэпсээтилэр, быһаардылар.
Бөлөх сарсыарда «Кэнчээри»оҕо уһуйааныгар уонна Т. И. Скрыбыкина аатын сүгэр орто оскуолаҕа сылдьан оҕолору, үөрэнээччилэри, иитээччилэри уонна учууталлары кытта көрсүстүлэр — үлэҕэ-хамнаска, үгэскэ туох ураты сүүрээннээхтэрин кытта билсистилэр, Пушкинскай картаны кэпсээтилэр. Оскуола иһинэн тэриллибит түмэл экспонаттарын сэҥээрдилэр. Култуура дьиэтигэр буолбут нэһилиэнньэ уопсай мунньаҕар бэрт истиҥ санаа атастаһыылар буоллулар, сонун этиилэр этилиннилэр. Олохтоохтор Олоҥхо ыһыаҕа сэргэхтик ыытыллан, дьоҥҥо-сэргэҕэ улуус, республика аата үрдүктүк ааттанарыгар бары кыһаллан биир санаанан тэрээһин үлэтигэр көхтөөхтүк кытталлар. Мунньах кэннэ Виктор Стручков олоҥхо ис тутулун, сыалын-соругун, саха халандаарын туһунан лиэксийэтин иһиттилэр. Оскуолаҕа Олоҥхо театрын музыкальнай редактора Вероника Лыткина хомуска оонньооһуҥҥа маастар кылаас ыытан оҕолор сүргэлэрин көтөхтө. Киэһээҥҥи өттүгэр Сордоҥноох нэһилиэгин айар куттаах дьонун кэнсиэрин көрдүлэр.

Олоҥхо ыһыаҕа буолуо аҕыйах ый хаалла. Онон бу күнтэн ыла үлэ ордук тэтимнээхтик, былааннаахтык барыахтаах диэн улахан сорук турар.