Республиканскай Олоҥхо ыһыаҕа быйыл сайын 16 төгүлүн Тымныы Чыпчаалыгар Томтор сиригэр-уотугар ыытылларынан, Өймөкөөн дьоно – сэргэтэ бүттүүн түмсэн, сомоҕолоһон, сүргэлэрэ көтөҕүллэн, бэлэмнэнии үлэлэр, тиһигин быспакка, тэтимнээхтик бара тураллар. Режиссерскай тэрийэр бөлөх кулун тутар 25 күнүгэр Өймөкөөн улууһун Томтор нэһилиэгэр үлэлээтэ.

Н. М. Заболоцкай — Чысхаан аатынан Томтордооҕу кыраайы үөрэтэр түмэлгэ уонна Чысхаан Ледовай резиденциятыгар ыалдьыттаата. Өймөкөөн баай историятын кытары билистилэр, көрдүлэр — иһиттилэр. Олоҥхо ыһыаҕа буолар сиригэр «Көмүс күрүө» түһүлгэҕэ сырыттылар.

РФ үтүөлээх учуутала, РФ үөрэҕириитин бочуоттаах үлэһитэ, СӨ Учууталларын Учуутала, Өймөкөөн улууһун бочуоттаах олохтооҕо, краевед, Томтор бөһүөлэгэр оскуолаҕа түмэл тэрийбит Мария Поликарповна Боярованы кытары көрсөн истиҥ кэпсэтии буолла.
Ону таһынан, Томтордооҕу модельнай библиотекаҕа Олоҥхо Ыһыаҕар бэлэмнэнии чэрчитинэн, Өймөкөөн улууһун култууратын салайааччыта Сивцева А.С. уонна олохтоох култуура үлэһиттэрин кытта көрүстэ. Сүрүн соругунан кэлэр Ыһыах сценарнай хаамыытын, программатын чопчулаан дьүүллэстилэр. Мунньахха бэлэмнэнии үлэ сүрүн тэрээһин боппуруостарыгар тохтоотулар. Ыһыахха, быһа барыллаан, өрөспүүбүлүкэбит араас муннуктарыттан 10 тыһыынча кэриҥэ ыалдьыт кэлэрэ күүтүллэр. Өймөкөөн хас биирдии олохтооҕо билигин Олоҥхо ыһыаҕар бэлэмнэнии сүпсүлгэнинэн олорор. Үгүс үлэ-хамнас, үөрүүлээх түбүктэр бараллар. Онно кыттыспыт киһи, историяҕа киирэн, бу тэрээһин тэтимигэр холбоһор.
Бу хаалбыт кэрчик кэмҥэ барыбытыттан күүрээннээх үлэ, эппиэтинэс, сомоҕолоһуу эрэйиллэр. Онон киэҥ далааһыннаах, үгүс элбэх ыалдьыттаах, дириҥ ис хоһоонноох, дьоһун ыһыах буолуоҕа диэн эрэнэбит