Чурапчы улууһугар РФ Норуодунай артыыһа, СӨ Судаарыстыбаннай сүбэһитэ, геокултуурунай сайдыы үнүстүүтүн генеральнай дириэктэрэ Андрей Борисовы кытта көрсүһүү буолла.

Дьаһалга улуус баһылыга Степан Саргыдаев, нэһилиэк баһылыктара, улуус салалталарын начаалынньыктара, тэрилтэ салайааччылара, уопсастыбанньыктар, култуура уонна ускуустуба эйгэтин үлэһиттэрэ кыттыыны ыллылар.

Андрей Саввич духуобунас, сиэр-майгы сыаннастарын харыстааһыҥҥа уонна сайыннарыыга​ аналлаах «ТҮМҮҮ — Төрүт үгэс мин үүнэр үктэлим» бырайыагы ​ сиһилии сырдатта. 

Ааспыт ый бүтүүтэ «ТҮМҮҮ» диэн СӨ Уопсастыбаннаһын мунньаҕа тэриллибит. Онно уопсайа 1600 кэриҥэ киһи кыттыыны ылбыт. Улуустартан, куораттартан 450 дэлэгээт кэлбит. Кэпсэтиилэр түмүктэринэн улахан бырыгараама оҥоһуллубут. Онуоха Ил Дархан Айсен Николаев сорудаҕынан СӨ Бырабыыталыстыбатыгар духуобунас, сиэр-майгы сыаннастарын бөҕөргөтүүгэ аналлаах бырагыраама ылыллыахтаах эбит.

Мунньахха Геокултуурунай сайдыы үнүстүүтүн үлэһиттэрэ — методист Саргылаана ​ Адамова Олоҥхо Дьиэлэрин биир кэлим систиэмэтин оҥоруу туһунан, толорооччу дириэктэр Андрей Мартынов үнүстүүт үлэлэтэр бырайыактарын туһунан билиһиннэрдилэр.

Салгыы Саха норуотун үгэс буолбут сыаннастарын бөҕөргөтүүгэ Олоҥхо тыйаатырын оруолун туһунан дакылааты тыйаатыр дириэктэрэ Мария Турантаева кэпсээтэ.

Тылы этиигэ дьаһал кыттыылаахтара олоҥхону тарҕатыыга, үөрэтиигэ тус санааларын үллэһиннилэр.

Көрсүһүү түмүгүнэн Андрей Борисов:

«Чурапчы дьоно-сэргэтэ, баһылык Степан​ Саргыдаев​ бары түмүллэн, санааларын түмэн, ааспыт үбүлүөйдэргэ, билигин ыытылла турар тэрээһиннэргэ суолта ууран, биһигини ыҥыран, туһалаах кэпсэтии тахсыбытыттан астынныбыт.

Тоҕус томтордоох Чурапчылар ырааҕы-киэҥи көрөр эбиккит. Биһиги Чурапчы улууһун Олоҥхо киинин салайааччыта Дмитрий Поповы кытары «Куруубай хааннаах Кулун Куллустуур​» олоҥхону туруоран, Дьокуускайга билигин тутулла турар Арктика киинигэр көрдөрөр туһунан кэпсэппиппит. Эрдэттэн туох​ баар култуура күүһүн-уоҕун түмэн, баар кыахтары туһанан испэктээги туруоруохха наада. Биһиги өттүттэн олоҥхо тыйаатыра көмөлөһүө, — диэн эрэннэрдэ.

Еще больше новостей в телеграм-канале Ulusmedia Марфа Петрова

Подробнее: https://санаолох.рф/article/94226