Үс күннээх, үс түүннээх Култуура, ускуустуба уонна литэрэтиирэ күннэрэ Чурапчы улууһугар түмүктэннилэр. Ыытыллыбыт маастар кылаастарга, быыстапкаларга, кэнсиэртэргэ, испэктээкиллэргэ уопсайа холбоон 5500 киһи сырытта, ол иһигэр 1500 оҕо. Онон бу ыытыллыбыт дьаһаллар Чурапчы улууһугар култуура таһыма үрдүгүн, култуураҕа интэриэс баарын өссө төгүл дакаастыыллар.
Чурапчы улууһун баһылыга Степан Саргыдаев махтал суругун Сергей Зверев – Кыыл Уола аатынан үҥкүү тыйаатырын дириэктэригэр Александр Алексеевка, СӨ норуодунай артыыһыгар Дмитрий Артемьевка, Үҥкүү тыйаатырын артыыстарыгар Эдуард уонна Саскылаана Жирковтарга, артыыс Семен Кузьмиҥҥа, бочуотунай грамотатын Бахсы бибилэтиэкэтин сэбиэдиссэйигэр Лариса Аргуноваҕа, Чурапчытааҕы киин бибилэтиэкэ сүрүннүүр бибилэтиэкэригэр Матрена Захароваҕа, “Үтүө суобастаах үлэтин иһин” бэлиэни Үҥкүү тыйаатырын артыыстарыгар Владислав Поповка, Ульяна Ядрееваҕа туттарда.
- Бу тэрээһиммитин СӨ култууратын министиэристибэтэ өйөөн, элбэх маастар кылаастар, сэминээрдэр ыытыллыбыттара түмүгүн булла уонна манан сиэттэрэн биһиги ыччаттарбыт, нэһилиэктэринэн норуот айымньытын дьиэлэрэ, ускуустуба оскуолалара, бибилэтиэкэлэр мантан барытыттан сүрэхтэригэр, өйдөрүгэр-санааларыгар үгүс элбэҕи иҥэриннилэр диэммин мин бүгүн бүк эрэллээх турабын. Үс күн устата барыта олус ситиһиилээхтик барбытыгар хас биирдиигит бары кыттыһан олорор онон эһиэхэ дириҥ, истиҥ махталбытын тириэрдэбит, — диэн улуус баһылыга Степан Анатольевич эттэ.
СӨ Норуот айымньытын уонна социально-култуурунай технология Өрөспүүбүлүкэтээҕи дьиэтин генеральнай дириэктэрэ Сергей Семенов СӨ Култуура уонна духуобунай сайдыы миниистирин махталын А.В. Посельская аатынан Дириҥнээҕи оҕо ускуустуба оскуолатын кэлэктиибигэр, СӨ геокултуурунай сайдыы үнүстүүтүн бочуотунай грамотатын Дириҥнээҕи оҕо ускуустуба оскуолатын уруһуй преподавателигэр Туяра Ивановаҕа, эстраднай ырыа преподавателигэр Александра Васильеваҕа анаата.
Чурапчы улууһун култуура салалтатын начаалынньыга Петр Гуляев Чурапчы улууһун сценатын бэтэрээнэ бэлиэни СӨ норуодунай артыыһыгар Дмитрий Артемьевка, улуус култууратын үрүҥ көмүс бэлиэлээх бочуотунай грамотатын Саскылаана уонна Эдуард Жирковтарга, Семен Кузьмиҥҥа, Валерий Прокопьевка туттартаата.
Чурапчы улууһун култуура салалтатын начаалынньыга Петр Гуляев:
- Олунньу ыйга Култуура министиэристибэтэ уонна улуус дьаһалтата сөбүлэҥ баттаһан, бу улахан тэрээһин буолла. Биһиги бу ыыппыт тэрээһиннэрбитигэр 2000 киһи кыттыа диэн былааннаабыт буоллахпытына, 2 күн устата 2000-ны лаппа куоһаран, түмүктүүр күҥҥэ 4 тыһыынча курдук киһи сырытта диэн этэбин. Бу барыта дьон-сэргэ кэрэ эйгэҕэ талаһарын, духуобунай сайдыы наадалааҕын бэлиэтиир. Өрөспүүбүлүкэ 22 култуураҕа, ускуустубаҕа, литератураҕа сыһыаннаах тэрилтэлэр, общественнай хамсааһыннар уонна улахан судаарыстыбаннай тыйаатырдар кэлэн кыттыбыттара бу бырайыак актуальнайын бигэргэтэр. Анаалыстаан көрдөхпүтүнэ, 300-тэн тахса оҕо, 800-тэн тахса улахан дьон сырыттылар. Бу көлүөнэ бары араҥата дьиҥ чахчы маннык үлэни-хамнаһы эрэйэрин көрдөрөр.
СӨ Норуот айымньытын уонна социально-култуурунай технология Өрөспүүбүлүкэтээҕи дьиэтин генеральнай дириэктэрэ Сергей Семенов:
Биһиги Чурапчытааҕы култуура салалтатын кытта бу Култуура, ускуустуба уонна литература күннэрин тэрийдибит. Бырагырааматтан саҕалаан, бу үс күн устата кимнээх кэлиэхтээхтэрин наардаан, сааһылаан оҥорбуппут. Үс күҥҥэ уочаратынан тыйаатырдары аҕалтаатыбыт. Маны таһынан композитордар, суруйааччылар, худуоһунньуктар кэлэ сырыттылар.
Кыттааччылар тэрээһини олус сөбүлээтилэр, сэҥээрдилэр. Бэйэлэрин дойдуларыгар эмиэ маннык хабааннаах тэрэһээни ыытыахтарын баҕардылар. Саҕалааһын Чурапчыттан саҕаланна уонна салгыы да баран иһиэ дии саныыбын. Олохтоохтор да көхтөөх кыттыыны ыллылар. Онон үчүгэй саҕалааһын буолла диэн этэбин.
