Убаастабыллаах Сахабыт сирин олохтоохторо!
Өбүгэлэрбититтэн ситимнэнэн уостан уоска бэриллэн кэлбит сүдү айымньыбыт, аар саарга аатырыан аатырар Олоҥхобут уруйданар күнэ үүммүтүнэн итиитик-истиҥник эҕэрдэлиибин!
Олоҥхо – саха норуотун аан дойду туһунан өйдөбүлэ, духуобунай сыаннаһа, төрүт итэҕэлэ уонна үгэһэ, тылын уонна култууратын баайа түмүллүбүт дириҥ ис хоһоонноох тылынан уус-уран айымньытын саамай үрдүк чыпчаала. Ол туһунан А.Е. Мординов суруйан турар: “Олоҥхо өйө-санаата дириҥинэн, ис хоһооно баайынан, тыла-өһө дэлэгэйинэн, уус-уран өртүнэн эҥкилэ суоҕунан, иэйиитэ күүһүнэн уонна нарынынан, кырдьык даҕаны уһулуччулаах айымньы”. Кырдьыга даҕаны, айылҕаттан сүдү талааннаах, уус-уран ойуулааһын искусствотын толору баһылаабыт олоҥхоһут уустаан-ураннаан хоһуйан, этэн-тыынан субурутан, хас биирдии геройун саҥатын, тойугун тус туһунан сахалыы кылыһахтаах куолаһынан дьиэрэтэн, ыллаан-туойан бардаҕына, хайа саха хаана хамсаабат, сүргэтэ көтөҕүллүбэт, дууһатын кылын таарыйтарбат буолуоҕай?!
Олоҥхолоон оҕонньор барахсан
Оллоонноон олорон эрэ
Олоҥхо номоҕо оҥостон,
Аан ийэ дайды айыллыбытын,
Алаҕаркаан-тэтэгэркээн
Алтан араҕас далбардаммытын
Дьэрэкээн ойуу курдук
Дьэргэлдьитэн түстэҕинэ,
Эриэккэстик этэн-тыынан
Эҕэлдьитэн киирдэҕинэ –
Унаар-мунаар көрбүт
Урааҥхай саха барахсан
Нохтолоох тойон сүрэҕэ долгуйан
“Ноо!” диирэ эбитэ үһү…
Былыр былыргыттан сахалар саамай улахан күүһүнэн тыл уонна санаа күүһүн ааҕаллара. Тыл иччитэ чахчы улахан күүстээх буолан, олоҥхо киһиэхэ эмиэ дьайар күүһэ-уоҕа олус улахан.
Саха норуотун тылынан уус-уран айымньытын үрдүк чыпчаалын – олоҥхону бүтүн аан дойду культуратыгар улахан суолтатын билинэн туран, 2005 сыллаахха ЮНЕСКО аан дойду культуратын шедевринэн уонна киһи-аймах уһулуччулаах нэһилиэстибэтинэн билиммитэ.
Онон ЮНЕСКО билиҥҥи кэмҥэ биһигиттэн туох-ханнык иннинэ олоҥхону аан дойду культуратын шедеврын быһыытынан үйэтитэри, харыстыыры, киэҥ эйгэҕэ таһаарары, наукаҕа дириҥник чинчийэри ирдиир, Саха правительствотын өйөбүлүнэн олоҥхо суолтатын өйдүүр, кини кэрэтин эттэригэр-хааннарыгар иҥэриммит үгүс норуот талааннаахтарын сыралаах үлэлэрин түмүгүнэн олоҥхобут аан дойду эпическай айымньыларын ортотугар бэйэтин суолун солонон аан дойду билиниитин ылла.
Күндү сахам дьоно!
Өбүгэлэрбит барахсаттар түҥ былыргыттан илдьэ кэлэн, биһиэхэ күндү бэлэх гынан туттарбыт олоҥхобут инникитин умнуллубат, сайдар, үйэтитэр суолларын тобулуоҕуҥ!
ХИФУ Олоҥхо институтун директорын эбээһинэһин толорооччу Р.Н. Анисимов