Саха Автономията төрүттэммитэ 100 сылын көрсө, Республиканскай Олоҥхо Ыһыаҕа 2022 сылга XV төгүлүн, төрүт саха норуота уутуйан үөскээбит, өҥ буордаах Үөһээ Бүлүү сиригэр-уотугар ыытылларынан, Үөһээ Бүлүү дьоно-сэргэтэ, бүттүүн түмсэн, сомоҕолоһон, сүргэлэрэ көтөҕүллэн, бэлэмнэнии үлэлэр тиһигин быспакка тэтимнээхтик бара тураллар.
Олоҥхо ыһыаҕын биир ураты кэрэ көстүүтүнэн уустар түһүлгэлээн мустар сирдэрэ-уоттара ураты болҕомтону ылар. Үтүмэн үйэлэр тухары үс саха урааҥхай удьуора үөскээбит, түөрт саха төлкөтө түстэммит, чапчыйан уһанар чап уустара төрүт түөлбэлэригэр – сымара тааһы уулларар, кытыастар кыһалаах, күөрэлдьийэр балталаах, күпсүйэр күөртээх, этитиилээх уус идэлээх, удьуордаан-уутуйан үөскээбит төрүт сирдэригэр сиэри-туому итэҕэли, үгэһи тутуһан, Өрөспүүбүлүкэбит араас муннуктарыттан уус идэлээхтэр түмсэн, аат ааттаан, анаан-минээн түмсүөхтэрэ.
Кэрэ Кэнтик нэһилиэгэр уус түһүлгэтин оҥоруу үлэлэрэ саҕаланна. Бу уустар түһүлгэлэригэр саха норуота былыр-былыргыттан илдьэ кэлбит билиилэрэ, сатабыллара арылыччы көстүөҕэ. Тимир уустарын түһүлгэтигэр күлүмүрдүүр көлөнү өрө күөдьүтэн, кылбаҥнас ыраас тимири уһааран, эгэлгэ оҥоһугу оҥорон, дьон болҕомтотун тардан, умсугуйан уһанар, тимири ыллатар уус идэлээхтэри, төрүт үгэһи өрө тутааччылар – Олоҥ