Итииник ааттаах быыстапка бэҕэһээ, кулун тутар 5 күнүгэр
Дьокуускай куоракка Емельян Ярославскай аатынан кыраайы үөрэтэр мусуойга биир дойдулаахпыт, РСФСР үтүөлээх, Саха АССР норуодунай артыыһа, П.А.Ойуунускай аатынан Судаарыстыбаннай бириэмийэ лауреата, «Бочуот Знага» уордьан кавалера, «Дьурулуйар Ньургун Боотур» олоҥхону туойан грампластинкаҕа уһултаран үйэтиппит, ССРС Суруйааччыларын сойууһун чилиэнэ Гаврил Колесов төрөөбүтэ 90 сылыгар ананан тэрилиннэ.
Тэрээһиҥҥэ Гаврил Колесов оҕолоро, чугас аймахтара, биир дойдулаахтара, Марк Жирков аатынан муусука колледжын устудьуоннара кытыннылар. Быыстапкаҕа экспонат быһыытынан оруолларын бэлиэтэммит блокноттара, уруһуйа, туттубут тэриллэрэ, таҥаһа, наҕараадалара
турдулар.
Мустубут дьон кыыһа Оксана Гаврильевна оҥорбут ахтыытын сэргээн иһиттилэр. Мэҥэ Хаҥалас улууһун култуураҕа уонна духуобунай сайдыыга управлениетын начаалынньыга Дмитрий Аргунов Аллараа Бэстээххэ
«Олоҥхо дьиэтэ» оройуоннааҕы норуот айымньытын киинигэр Гаврил Колесов аата иҥэриллэрин туһунан иһитиннэриитэ ытыс тыаһынан доҕуһуолланна.
Олоҥхону толорооччу ыччаттар өрөспүүбүлүкэтээҕи түмсүүлэрин салайааччыта Юрий Борисов биир дойдулаахтарбыт Гаврил Колесов төрөөбүтэ 90, Николай Степанов‒Ноорой 125 сылларыгар аналлаах «Куйуур олоҥхото» бэстибээл 1-кы Тыыллыма нэһилиэгэр кулун тутар
18 ‒ 19 күннэригэр ыытылларын иһитиннэрдэ.
В.П.Ларионов аатынан Майа орто оскуолатын 9 кылааһын үөрэнээччитэ, Майатааҕы «Кэрэли» оҕону эбии сайыннарар киин иитиллээччитэ Дархан Жирков (салайааччы Анастасия Слепцова) «Дьурулуйар Ньургун Боотур» олоҥхоттон быһа тардан туойан иһитиннэрдэ.
Быыстапка кулун тутар 22 күнүгэр диэри туруоҕа.
«Олоҥхо дьиэтэ» норуот айымньытын киинин фотолара
