Бу куннэргэ Олоҥхо ыһыаҕар эппиэттээх Саха тыйаатырын кылаабынай режиссёра Руслан Игоревич Тараховскай салайааччылаах сүрүн бөлөх Дьокуускай куораттан кэлэн, өрүс уҥуор сытар нэһилиэктэри кэрийэн үлэлии сылдьар. Нэһилиэктэр уран тарбахтаахтарын – иистэнньэҥнэрин, уустарын, култуура үлэһиттэрин кытта көрсүһүүгэ тэрийэр бөлөх ыһыах сценарийын билиһиннэрдилэр. Бу улахан тэрээһин улуус бары олохтоохторун көхтөөх кыттыыларыттан быһаччы тутулуктааҕын бэлиэтээтилэр. Сарсын маннык хабааннаах көрсүһүүлэр федеральнай суолу кыйа сытар нэһилиэктэринэн ыытыллыахтара.
⠀
Онтон улуус киинигэр Саха тыйаатырын сүрүн худуоһунньуга, ыһыахпыт сүрүн костюмер-худуоһунньуга, биир дойдулаахпыт Сардаана Симоновна Федотова Олоҥхо ыһыаҕын сүрүн сценограбын Шапошникова Екатерина Ефимовнаны кытта улуус баһылыгын, нэһилиэк баһылыктарын уонна кинилэр кэрэ аҥардарын, тэрилтэ салайааччыларын кытта көрсөн, сахалыы төрүт таҥас эскиистэрин көрдөрөн, таҥас өҥүгэр, матырыйаалыгар сүбэ-ама биэрдилэр, иискэ сакаас ыллылар.
Сарсын маннык хабааннаах көрсүһүү сарсыарда 10:00 чаастан култуура үлэһиттэригэр, күнүс 14:00 чаастан улуус иистэнньэҥнэригэр анаан Оройуоннааҕы култуура дьиэтигэр ыытыаллыахтаах. Көхтөөх кыттыыны ыларгытыгар ыҥырабыт.
⠀
Биир көдьүүстээх көрсүһүү ыһыах тэрээһинигэр “көстүбэт, ол эрэн биир сүрүн эппиэттээх үлэҕэ сылдьар байыастарга” – тыаһы-ууһу таҥан таһаарааччы звукорежиссердарга, звукооператордарга анаан ыытыллынна. Ол курдук, Олоҥхо ыһыаҕын доҕуһуолугар, ырыанан киэргэтиигэр сүбэлэри талааннаах музыкант Евгений Тазетдинов биэрдэ.
⠀
Онтон, ХV Олоҥхо ыһыаҕар диэри 100 хонук хаалбытын бэлиэтиир үөрүүлээх тэрээһиннэр кулун тутар 13 күнүгэр ыытыллыахтара
