Бүгүҥҥү кулун тутар 16 үтүмэн үөрүүлээх дьоро күҥҥэ, үс үллэр үөстээх Өлүөнэ эбэбит үрдүн өҥөйөн турар, аҕыс-иилээх саҕалаах, атааннаах-мөҥүөннээх айгыр-силик аан ийэ дойдубутун си гынан силбэһиннэрэр айан аартыгын айаҕар, ыраахтан-чугастан ылбаҕай ырыатынан-тойугунан, омуннаах олоҥхотунан ыҥыра-угуйа турар Олоҥхо Дьиэтигэр киэн тутта албан ааттыыр биир дойдулаахпыт РСФСР, Саха АССР үтүөлээх, Саха АССР норуодунай артыыһа, РСФСР Суруйааччыларын союһун чилиэнэ, П.А. Ойуунускай аатынан Государственнай бириэмийэ лауреата, уһуйааччы ГАВРИИЛ ГАВРИЛЬЕВИЧ КОЛЕСОВ аата үрдүк үөрүүлээхтик иҥэрилиннэ!
Бу дьоһун, дьоро тэрээһиҥҥэ Гавриил Гаврильевич оҕолоро, аймахтара, бииргэ үлэлээбит дьонноро, биир дойдулаахтара, суруйааччылар, олоҥхоҕо эйгэтигэр үлэлиир, Гавриил Колесов олоҕун, айар-үлэтин үөрэтээччилэр, тарҕатааччылар, үйэтитээччилэр мустан истиҥ иһирэх кэпсэтиһиилээх ахтыы күнэ буолла.
Олоҥхо дьиэтигэр Г.Г. Колесов аатын иҥэрии туһунан бу сыл кулун тутар 4 күнүгэр Мэҥэ-Хаҥалас улууһа муниципальнай тэриллии оройуоннааҕы депутаттар сэбиэттэрин 33-с ситэриилээх сессияларыгар РСФСР, Саха АССР үтүөлээх, Саха АССР норуодунай артыыһа, РСФСР Суруйааччыларын союһун чилиэнэ, П.А. Ойуунускай аатынан Государственнай бириэмийэ лауреата, уһуйааччы ГАВРИИЛ ГАВРИЛЬЕВИЧ КОЛЕСОВ аатын оройуоннааҕы норуот айымньытын киинэ “Олоҥхо Дьиэтигэр” иҥэрэр туһунан куоластааһын түмүгүнэн сөбүлэҥҥэ олоҕуран быһаарыныы ылыллыбыта. Бу быһаарыныыны Мэҥэ-Хаҥалас улууһун депутаттарын сэбиэтин председателэ Сазонов Павел Данилович, депутаттар ааттарыттан Мэҥэ-Хаҥалас улууһун “Бизнес инкубатор” тэрилтэ салайааччыта Скрябин Николай Николаевич туттарыытынан үөрүүлээх тэрээһин саҕаланна. Ыраахтан дьэндэйэн көстүөхтээх, уоттаах-күөстээх, кэлбити-барбыты ыҥыра-угуйа туруохтаах “Гавриил Гаврильевич Колесов аатынан Олонхо Дьиэтэ” диэн бэлиэ суругу Мэҥэ-Хаҥалас улууһа муниципальнай тэриллии баһылыгын 1 солбуйааччыта Потапов Семен Семенович, Гавриил Колесов кыыһа СР үтүөлээх артыыската Колесова Оксана Гаврииловна, Олонхо Дьиэтин директорын эбээһинэһин толорооччу Васильева Айта Семеновна уруйдаах-айхаллаах үөрүүлээх быһыыга-майгыга арыйдылар.
Үөрүүлээх тэрээһин алгыс түһэрии сиэриттэн-туомуттан саҕаланна, Аан Дархан олоҥхону толорооччу, алгысчыт Петр Максимович Тихонов “Гавриил Колесов Саха киһитин ытык чыыһылата тоҕустаах эбит, оруобуна күн сирин көрбүтэ 9 күнэ ааһыыта, Олоҥхо Дьиэтэ аанын тэлэччи арынан айа-тута үлэлээбитэ 9 сыла туолуута кини албан аатын үйэтитэн Олоҥхо Дьиэтигэр иҥэрилиннэ!” – диэн олус үчүгэйдик бэлиэтээн алгыһын түһэрдэ. Үтүө киһи Гавриил Колесов туһунан истиҥ кэпсэтиини Мэҥэ Хаҥалас улууһун баһылыгын 1-кы солбуйааччы Потапов Семен Семенович арыйда, СӨ Судаарыстыбаннай мунньаҕын бэрэссэдээтэлин солбуйааччы, 10 Олоҥхону тэрийэр кэмитиэт бэрэссэдээтэлэ Жирков Александр Николаевич эҕэрдэ суругун туттарда, Мэҥэ Хаҥалас улууһун культураҕа уонна духуобунай сайдыыга управлениятын начальнига Аргунов Дмитрий Иванович бу сыл былаһын тухары Гавриил Колесовка анаммыт тэрээһиннэр былааннарын, чуолаан Сахабыт Сирин үрдүнэн айанныахтаах “Киэн Куйаар олоҥхоһута” Гавриил Колесов бэлиэ айана барыахтааҕын сырдатта, биир дойдулаахтарын ааттарыттан, алтыспыт доҕоро Мучин Матвей Васильевич, Саха академическай театрыттан бииргэ үлэлээбит, оонньообут коллегалара, норуот таптыыр артыыстара Ефим Николаевич Степанов, Герасим Семенович Васильев, Софья Иннокентьевна Баранова, Анатолий Павлович Николаев олус истиҥник ахтан санаан Гавриил Колесов айар олоҕун аҕыннылар. Ыҥырыылаах ыалдьыттар СР Олонхо театрын салайааччыта Мария Васильевна Турантаева, СР суруйааччыларын сойууһуттан Семен Андреевич Попов- Сэмэн Тумат, Степан Ефремович Сивцев-Хамалҕа, М.К.Аммосов аатынан ХИФУ профессора, биллэр көстөр учуонай, олоҥхону чинчийээччи Илларионов Василий Васильевич, Олоҥхо институтун салайааччыта Анисимов Руслан Николаевич, СР “Ыччат Олоҥхоһут” түмсүү салайааччыта, эдэр учуонай Борисов Юрий Петрович, СӨ Олоҥхо Ассоциациятын Президена Шишигина Февронья Васильевна, вице-президент Протодьяконова
Елена Николаевна, Гавриил Колесов үөрэнээччилэрин ааттарыттан Гавриил Колесов бэйэтэ туруорсан арыйтарбыт Дьокуускайдааҕы Марк Жирков аатынан музыкальнай колледж фольклорга салаатын салайааччыта Элеонора Кулагиновна Соколова, Баатараттан биир дойдулаахтара, баһылык Иван Николаевич Матвеев, “Герой Ф.К.Попов аатынан музей салайааччыта Альбина Егоровна Ходулова истиҥ иһирэх тыл эттилэр. Бүгүҥҥү күҥҥэ кэлбит ыалдьыттар бука бары “Олоҥхону үйэтиппит үтүөлээх” Гавриил Колесов олоҕун, айар үлэтин сырдатар, тус бэйэтэ кэппит таҥаһын-сабын, туттар малын-салын көрдөрөр анонс-выставканы Дьокуускайдааҕы Емельян Ярославскай аатынан Хотугу норуоттар культураларын уонна историяларын музейын выставочнай саала салайааччыта Марианна Васильевна Стручкова, культурнай-сырдатар отдел салайааччыта Октябрина Петровна Максимова аҕалан туруорбуттара бүгүҥҥү дьоро тэрээһин суолтатын үрдэттэ, кэҥэтэн, дириҥэтэн биэрдэ. Дьоллоох дьоро түһүлгэни Сахабыт Сиригэр ыытыллыбыт араас олоҥхо түһүлгэлэрин кылаан чыпчаал кыайыылаахтара айылҕалаах ыччат олоҥхону толорооччу Виталий Никифоров Гавриил Колесов үйэлэргэ үйэтиппит П.А.Ойуунускай “Дьулусханнаах Дьолуо маҥан халлаан Дьураатыгар тура төрүөбүт Дьураа хара аттаах Дьулуруйар Ньургун Боотур” олоҥхотунан, Лука Турнин аатынан стипендиат Игорь Игнатьев хомоҕой хомус тыаһынан, Марк Жирков аатынан музыкальнай колледж уһуйааччылара Элеонора Соколова, Надежда Варламова, олоҥхоһут Н.И.Степанов –Ноорой сиэнэ удьуор хаан тойуксут Аксинья Степанова кэрэ куоластарынан киэргэттилэр. Тэрээһин түмүктүүр чааһыгар Гавриил Колесов оҕолоро Оксана Гаврииловна, Владимир Гавриилович олус истиҥ иһирэх тылларынан аҕаларын аҕыннылар, бар дьоҥҥо махтал тылларын эттилэр уонна түмүккэ РСФСР, Саха АССР үтүөлээх, Саха АССР норуодунай артыыһа, РСФСР Суруйааччыларын союһун чилиэнэ, П.А. Ойуунускай аатынан Государственнай бириэмийэ лауреата, уһуйааччы Гавриил Колесов “көмүс фондаттан” ылыллан тахсыбыт ССРС 50 сылыгар анаан өрө көтөҕүүлээхтик таһаарбыт оһуохайын видеотын көрдөрүүтүнэн “Бар дьоммор дьол, эйэ олохтоннун!” диэн Гавриил Колесов үөрүүлээх уруйдаах, айхаллаах тылларынан түмүктээтибит!
Айта Васильева-Гавриил Колесов аатынан Мэҥэ-Хаҥалас улууһун норуот айымньытын киинин уус-уран салайааччыта.