Аны икки ыйтан ордугунан, бэс ыйын 20-21 күннэригэр, Үөһээ Бүлүү улууһугар Саха АССР тэриллибитэ 100 уонна Саха сиригэр Ийэ сылларыгар аналлаах өрөспүүбүлүкэтээҕи XV Олоҥхо ыһыаҕа киэҥ далааһыннаахтык ыытыллыаҕа. Билигин халлаан лаппа сылыйан, Үөһээ Бүлүү сэлиэнньэтиттэн чугас маанылаах Бүлүү өрүһү өҥөйөн сытар Түгэхтэй алааһыгар Олоҥхо түһүлгэтин оҥоруу күөстүү оргуйан эрэр. Санатар буоллахха, былырыын сөптөөх үп көрүллэн, ыһыах ыытыллыахтаах түһүлгэтэ, күрүөтэ-хаһаата улахан аҥаара үмүрүтүллүбүт. Түһүлгэ сүрүн тутуута — Аал Луук мас тимир каркааһа туруоруллубут, 1500 олбохтоох түрүбүүнэ улахан аҥаара оҥоһуллубут. Ыраахтан көрдөххө, түрүбүүнэ хотой кыыл көтөн кэлэн олорорун санатар моһуоннаах буолар. Билигин хас биирдии нэһилиэккэ анаан саха балаҕанын сэргэ, ыһыахха кэлбит дьоҥҥо аналлаах хорчуоппалары тутуу бара турар.
Ол туһунан балаҕаннары тутууга үлэлии сылдьар Яков Михайлов: «Үлэлээбиппит ыйтан орто. 21 саха балаҕанын тутуохтаахпытыттан тохсуспутугар тиийдибит. Салгыы маннык хабааннаахтык тутан иһиэхпит. 7 да 6-лаах балаҕаннар. Үрдүктэрэ 2 м 50 см. Эркиннэрин 15 см халыҥнаах СИП-панель диэн матырыйаалынан оҥоробут, онон олох ичигэс буолуохтара. Икки эркини кыйа олбохтор оҥоһуллуохтара. Сылааһы биэрэр конвектордаах буоланнар, балаҕаннар кыһын кытары сылаас туруохтара. Ол эбэтэр, кыһын кытта дьон сынньанан- өрөөн ааһар сирдэрэ-уоттара буолуоҕа. Биригээдэҕэ сэттиэбит, ыһыахха диэри балаҕаннар туох-баар силиктэрин ситэриэхпит. Биһиги холлоҕоһун, олбохторун уонна ис-тас эпсиэйдэрин “уһаныахпыт”, оттон сандалытын, көмүлүөгүн атын биригээдэ оҥорор», — диэн кэпсээтэ. Балаҕаннар сүрүн түһүлгэттэн син ыраах тураллар эрээри, суолу былырыын улахан аҥаарын аспаалынан бүрүйбүттэр, хаалбытын сотору халлаан лаппа сылыйдаҕына ситэриэхтэрэ. Онон хатыҥ, тиит булкаастаах тыа иһинэн тыргыллар аспаал суолунан өр гынан сүрүн түһүлгэҕэ киириллэр.
© edersaas.ru сайтан: https://edersaas.ru/ee-b-l-olo-ho-y-ya-ar-belemnenii-video-haartyskalar/