Олоҥхо тыйаатыра быйылгы Олоҥхо ыһыаҕар дьоһун бэлэҕи оҥордо. Олохтоох олоҥхоһут Андрей Титович Титаров «Хардааччы Бэргэн» олоҥхотун Олоҥхо тыйаатыра испэктээкил быһыытынан аан бастаан туруорбутун көрөөччү олус ылынна, биһирээтэ, «бис-браво» хаһыынан, дохсун ытыс тыаһынан доҕуһуоллаата. Бастакы туруоруу Олоҥхо ыһыаҕар уонна бастакы Олоҥхо дьиэтигэр турбута ордук суолталаах.
Испэктээкил режиссера — Павел Колесов, уус-уран салайааччы — Андрей Борисов. Испэктээкил бастакы күнүгэр Ил Дархан Айсен Николаев кэлэн көрдө, артыыстарга махтанна. А.Т. Титаров — кини эһэтэ, Аҕа дойду сэриитин кыттыылааҕа буолар.
![](https://edersaas.ru/wp-content/uploads/2022/06/Hardaachchy-3.jpg)
Олоҥхо тыйаатырын дириэктэрэ Мария Турантаева:
— Испэктээкилгэ тыйаатырбыт эдэр, кэскиллээх артыыстара оонньуу сылдьаллар. Кинилэргэ Щепкиннээҕи 6-с устуудьуйа оҕолоро кэлэн эбии күүс-көмө буолаллар. Испэктээкил бэҕэһээ эрэ күн сирин көрдө. Дьон бөҕө Олоҥхо дьиэтигэр тоҕуоруһан кэлэн, көрөн-истэн, биһирээн барбытыттан үөрэбит. «Хардааччы Бэргэн» олоҥхо-испэктээкил бэйэтэ туспа суоллаах-иистээх, кини уратыта — аныгы технологиялары туһанан, оҥоһуллубут. Бу испэктээкил репертуарбытыгар киириэҕэ, онон кэлэн көрөргүтүгэр ыҥырабын.
![](https://edersaas.ru/wp-content/uploads/2022/06/Hardaachchy-1.jpg)
Дьэ, испэктээкили киһи биир тыынынан киинэ курдук көрөр. Бу — үҥкүү уонна тойук, уот-күөс уонна тыас-уус, тыл уонна оҥорон көрүү, былыргы уонна аныгы олох силбэһиитэ, биир дьайыыта. Олус сиэдэрэй көстүүлээх (нууччалыы эттэххэ, »зрелищнэй») уонна хамсаныылаах, сюжета түргэнник сайдан иһэр буолан, оҕолор, ыччаттар көрөллөрүгэр интэриэһинэй, кинилэри олоҥхоҕо сыһыарарга тоҕоостоох буолуо. Манна көрүөххүт — куупал аннынан көтүүнү, абааһылар үҥкүүлэрин, Хардааччы Бэргэн уонна Тимир Дьигистэй охсуһууларын, бэл, кинилэр эрэллээх көлөлөрө Дьөһөгөй оҕото уонна Оҕус киирсиилэрин… Сыана кэтэҕэр видео эбиллэн, көстүүнү өссө киэргэттэ, толорон биэрдэ.
Артыыстар да оруолларыгар киирэн, сороҕор киһи аһыныах, сороҕор сөҕүөх-махтайыах курдук оонньоотулар. Көрөөччү иэйиитэ оонньуур, уйулҕата хамсыыр буоллаҕына, ол аата, испэктээкил табыллыбыт, артыыстар сыалларын сиппиттэр.
Хардааччы Бэргэни Гаврил Менкяров итэҕэтиилээхтик оонньоото. Кини этэринэн, иккис күҥҥэ көрөөччүлэр өссө сылаастык ылыннылар, »өссө!», »биис-браво!» хаһыы бөҕөтүн түһэрдилэр. Оттон Ат уонна Оҕус киирсиилэрин сюжета саха остуоруйатыгар хабааттар.
Онон сүүстэ истиэхтээҕэр, биирдэ кэлэн көрбүт ордук!
Үөһээ Бүлүүттэн Ангелина Васильева, »Саха сирэ» хаһыат, edersaas.ru
Олоҥхо тыйаатырын дириэктэрэ Мария Турантаева олоҥхо-испэктээги туруоруу туһунан кэпсиир, видео-устууну көрүҥ.