25.11.2022, 21:07
![](https://sakha-sire.ru/wp-content/uploads/2022/11/img_20221125_172346__01.jpg)
Бүгүн Олоҥхо күнүгэр СӨ Судаарыстыбаннай сүбэһитэ, судаарыстыбаннай уонна култуура диэйэтэлэ, уhулуччулаах режиссер Андрей Борисов «Арассыыйа — мин устуоруйам» историческай пааркаҕа ыытыллыбыт бары тэрээһиннэргэ көхтөөхтүк кытынна.
«Саха сирэ» хаһыат саайтыгар анаан кини Олоҥхо дьиэлэрин ситимнээх үлэлэригэр сыһыаннаан санаатын маннык тиэртэ:
![](https://sakha-sire.ru/wp-content/uploads/2022/11/screenshot_20221125-202403.jpg)
— Быйыл сайын Үөһээ Бүлүүгэ ыытыллыбыт Олоҥхо ыһыаҕар улуустар баһылыктарын кытта сүбэлэһэн баран, Олоҥхо дьиэлэригэр биир ситимнээх үлэни тэрийэргэ сүбэлэспиппит. Онон Олоҥхо күнүгэр бу толкуй олоххо киирдэ — 10 улуус баһылыга уонна бэрэстэбиитэлэ Сөбүлэҥҥэ илии баттаатылар.
![](https://sakha-sire.ru/wp-content/uploads/2022/11/img_20221125_161157-1.jpg)
Бу докумуон олус дириҥ ис хоһоонноох уонна суолталаах. Илии баттаспыт улуус баһылыктара да, тэрилтэ салайыыччылара да норуот аатыттан «Олоҥхо сайдыытыгар кэскиллээх үлэни тэрийиэхпит, араас бырайыактары сонун сүүрээннэри көҕүлүөхпүт уонна өйүөхпүт», — диэн санааларын докумуонунан бигэргэттилэр.
Онон Олоҥхо күнүгэр итинник докумуон баар буолуута — барыбыт үлэтигэр төһүү уонна тирэх буолуоҕа.