«Кыһыҥҥы» диэн ааттаах Арассыыйа ааптардарын киинэлэрин бэстибээлигэр уон үлэттэн лауреат үрдүк аатын ылбыт «Кэрэни көрбүт» режиссер Любовь Борисова киинэтэ ахсынньы 22 күнүттэн прокакка тахсаары турар. Пресс-көрдөрүү Гагарин аатынан аныгы ускуустуба киинигэр ахсынньы 12 күнүгэр буолла.
Киинэҕэ Олоҥхо тыйаатырын артыыһа Наталья Слепцова-Корякина кыра эрээри, сүрдээх суолталаах оруолу оонньообут. Бу үлэтин туһунан кини маннык санаалары үллэһиннэ:

• Икки сыллааҕыта Любовь Борисова эрийэн:» Икки ыйынан киинэ устаары сылдьабын, онно биир оруолга эйигин ыҥырыам этэ,»- диэтэ. Сценарийын ыыппытын аахтым, тута сөбүлэҥмин биэрдим, үөрүүнү кытта. Тыйаатырбыт дириэктэрэ М.В.Турантаева бу бырайыагы өйөөбүтэ, ол курдук киинэҕэ анаан тигиллибит дьахтар сахалыы мааны соно, үрүҥ көмүс симэҕэ (А.Неустроева, Л.Федорова уо.д.а.) тыйаатырга ылыллан хаалбыта. Бу сүрдээх дьаныардаах уһун үлэ түмүгэр оҥоһуллан тахсыбыт сахалыы толору кэмпилиэк буолбутун бэлиэтиэххэ наада.

Киинэни Таатта ытык сиригэр-уотугар уһулбуттара, мин уһуллубут симиэнэм Былатыан Ойуунускай төрөөбүт алааһыгар түбэспитэ. Этиэхтэн кэрэ сайыҥҥы күннэр турбуттара, Ойуунускай алааһыгар күн тахсыыта ураты кэрэ, бэлиэ түгэн буолан сүрэххэ-санааҕа иҥэн хаалбыт эбит…
Бу эпизодтарга оонньуурбар улахан ыарахаттары көрсүбэккэ үлэлээбиппэр устар хамаанда профессиональнай таһыма үрдүгүн хайаан да бэлиэтиэххэ наада: режиссер көмөлөһөөччүтэ Настя Пительтан саҕалаан бука бары идэлэригэр бэриниилээх дьон үлэлэспиттэригэр махтана саныыбын. Киинэбит өссө даҕаны бэстибээллэргэ ааттанан иһиэ, саха киинэтин аан дойдуга көрдөрүө-биллэриэ диэн эрэнэбин. Чуолаан Любовь Борисоваҕа бу күннэргэ Казахстан Алматы куоратыгар буолар Азия киинэтин бэстибээлигэр ситиһиини баҕарыаҕыҥ