![](https://sakha-sire.ru/wp-content/uploads/2023/05/img-20230430-wa0131-900x596.jpg)
Бу күннэргэ Өймөкөөн улууһугар ыытыллыахтаах Олоҥхо ыһыаҕар үгүс өрүттээх бэлэмнэнии үлэ бары хайысханан тэтимнээхтик ыытыллар.
Бу туһунан Томтор нэһилиэгин баһылыга Алексей Винокуров маннык сырдатар:
![](https://sakha-sire.ru/wp-content/uploads/2023/05/img-20230329-wa0121.jpg)
— Бүгүҥҥү күҥҥэ Олоҥхо ыһыаҕын түһүлгэтин биэс улахан эбийиэгэр үлэ бара турар.
![](https://sakha-sire.ru/wp-content/uploads/2023/05/img-20230424-wa0062-1.jpg)
Куйдуһуҥҥа — алтыс биригээдэ, сэттис биригээдэ ипподромҥа үлэлиир.
![](https://sakha-sire.ru/wp-content/uploads/2023/05/img-20230503-wa0130.jpg)
Нэһилиэкпитигэр тупсаҕай оҥоһуулаах балаҕан тутуута түмүктэнэн эрэр.
![](https://sakha-sire.ru/wp-content/uploads/2023/05/img-20230503-wa0123.jpg)
Толору хааччыллыылаах балаҕан кыһыннары үлэлиэҕэ. Манна ытык кырдьаҕастарбыт мустар сирдэрэ буолуоҕа.
![](https://sakha-sire.ru/wp-content/uploads/2023/05/img-20230503-wa0120.jpg)
Сырдыга, тупсаҕайа — уопуттаах маастардар туппуттара дии саныы сылдьыахпыт.
![](https://sakha-sire.ru/wp-content/uploads/2023/05/img-20230424-wa0061-1.jpg)
Ыһыахтыыр түһүлгэҕэ Аал Луук Мас тутуута тэтимнээхтик барар.
![](https://sakha-sire.ru/wp-content/uploads/2023/05/img-20230503-wa0116.jpg)
Дьон хаартыскаҕа түһэр зоналарын бэлэмнээн бүтэрдибит.
![](https://sakha-sire.ru/wp-content/uploads/2023/05/img-20230502-wa0080.jpg)
Ипподромҥа Мирон Егоров салайааччылаах олохтоохтортон тэриллибит биригээдэ 512 миэстэлээх дьон ат сүүрдүүтүн олорон көрөр тырыбынатын тутан бүтэрэн эрэр.
![](https://sakha-sire.ru/wp-content/uploads/2023/05/img-20230502-wa0066.jpg)
Маны таһынан, күрүө-хаһаа тутулла турар, аттар сүүрэр суолларыгар буор кутуллан бүттэ. Тутуу матырыйаала кэмигэр кэлэн, үлэ харгыстаммат. Онон уолаттар үлэлэрин сотору кэминэн түмүктүүр соруктаахтар.
![](https://sakha-sire.ru/wp-content/uploads/2023/05/screenshot_20230503-185822.jpg)
Сордоҥноох эр дьоно тыаҕа тахсан, талах быһар кэми баттаһан, бу күннэргэ ыһыах сиэригэр-туомугар туттулар олоппоско талах быһан бэлэмнээтилэр. Улуустааҕы култуура управлениетын нэһилиэктэринэн түһэрбит былаана — 20 устуука талах олоппос. Улуус киинигэр Уус Ньараҕа 40 талах олоппос оҥоһуллуохтаах.
![](https://sakha-sire.ru/wp-content/uploads/2023/05/screenshot_20230503-185430__01__01.jpg)
Маай бырааһынньыгар улуус киинигэр «Салама баайыыта» тэрээһини ыыттылар. Манна араас омук дьоно көхтөөх кыттыыны ыллылар. Бу саламалары улуус киинин олохтоохторо Олоҥхо ыһыаҕар туттуохтара.
![](https://sakha-sire.ru/wp-content/uploads/2023/05/s.-sordonnoh.jpg)
Нэһилиэк аайы дьахталлар түмсүүлэрэ мустан олбохтору тигэллэр, туос ыаҕайалары оҥорон бэлэмнииллэр.
![](https://sakha-sire.ru/wp-content/uploads/2023/05/s.-ojmyakon.jpg)
Салама бэлэмнииллэр, нэһилиэк аайы ситии баайаллар.
![](https://sakha-sire.ru/wp-content/uploads/2023/05/s.-teryut.jpg)
Дьокуускай куоракка биир дойдулаахтар эмиэ түмсэн, төрөөбүт Өймөкөөннөрүгэр өйөбүл буолан, бары үлэҕэ көхтөөхтүҥ кытталлар.
![](https://sakha-sire.ru/wp-content/uploads/2023/05/img-20230503-wa0148.jpg)
Ити курдук, Өймөкөөн улууһун олохтоохторо Олоҥхо ыһыаҕар бэлэмнэнии үлэтигэр тэрээһиннээхтик кытталлар.