Бу күннэргэ Өймөкөөн улууһугар ыытыллыахтаах Олоҥхо ыһыаҕар үгүс өрүттээх бэлэмнэнии үлэ бары хайысханан тэтимнээхтик  ыытыллар.

Бу туһунан Томтор нэһилиэгин баһылыга Алексей Винокуров маннык сырдатар:

— Бүгүҥҥү күҥҥэ Олоҥхо ыһыаҕын түһүлгэтин биэс улахан эбийиэгэр үлэ бара турар.

Куйдуһуҥҥа — алтыс биригээдэ, сэттис биригээдэ ипподромҥа үлэлиир.

Нэһилиэкпитигэр  тупсаҕай оҥоһуулаах балаҕан тутуута түмүктэнэн эрэр.

Толору хааччыллыылаах балаҕан кыһыннары үлэлиэҕэ. Манна ытык кырдьаҕастарбыт мустар сирдэрэ буолуоҕа. 

Сырдыга, тупсаҕайа — уопуттаах маастардар туппуттара дии саныы сылдьыахпыт.

Ыһыахтыыр түһүлгэҕэ Аал Луук Мас тутуута тэтимнээхтик барар.

Дьон хаартыскаҕа түһэр зоналарын бэлэмнээн бүтэрдибит.

Ипподромҥа  Мирон  Егоров  салайааччылаах олохтоохтортон тэриллибит биригээдэ 512 миэстэлээх  дьон ат сүүрдүүтүн олорон көрөр тырыбынатын тутан бүтэрэн эрэр.

Маны таһынан, күрүө-хаһаа  тутулла  турар, аттар  сүүрэр  суолларыгар буор кутуллан бүттэ.   Тутуу матырыйаала кэмигэр кэлэн,  үлэ  харгыстаммат. Онон уолаттар үлэлэрин сотору кэминэн түмүктүүр соруктаахтар.

Сордоҥноох эр дьоно тыаҕа тахсан, талах быһар кэми баттаһан,  бу күннэргэ ыһыах сиэригэр-туомугар туттулар олоппоско талах быһан бэлэмнээтилэр.  Улуустааҕы култуура управлениетын нэһилиэктэринэн түһэрбит  былаана — 20 устуука талах олоппос. Улуус киинигэр Уус Ньараҕа  40 талах олоппос оҥоһуллуохтаах.

Маай бырааһынньыгар улуус киинигэр «Салама баайыыта» тэрээһини ыыттылар. Манна араас омук дьоно көхтөөх кыттыыны ыллылар. Бу саламалары улуус киинин олохтоохторо Олоҥхо ыһыаҕар туттуохтара.

Нэһилиэк аайы дьахталлар түмсүүлэрэ мустан олбохтору тигэллэр, туос ыаҕайалары оҥорон бэлэмнииллэр.

Салама бэлэмнииллэр, нэһилиэк аайы ситии баайаллар.

Дьокуускай куоракка биир дойдулаахтар эмиэ түмсэн, төрөөбүт Өймөкөөннөрүгэр өйөбүл буолан, бары үлэҕэ көхтөөхтүҥ кытталлар.

Ити курдук, Өймөкөөн улууһун олохтоохторо Олоҥхо ыһыаҕар бэлэмнэнии үлэтигэр тэрээһиннээхтик кытталлар.