Өймөкөөҥҥө ыытыллар «Айыы санаа айана» диэн Олоҥхо ыһыаҕын тэрээһиннэрэ бэс ыйын 29 күнүттэн саҕаланнылар.
![](https://olonkho.nlrs.ru/wp-content/uploads/2023/06/2da7bf2e-9e57-4e69-af0f-b993801ff71e-1024x461.jpg)
Бу ыһыах кэмигэр 80-тан тахса култуурунай тэрээһин, 15 спортивнай күрэхтэһии, 20 араас хайысхалаах куонкурус ыытыллара былааннанар.
«Көмүс күрүө» этнографическай комплекска от ыйын 1 күнүгэр буолар үөрүүлээх аһыллыы театрализованнай дьүһүйүүтүн туһунан Олоҥхо тыйаатырын дириэктэрэ, бу туруорууга сүрүн эппиэтинэстээх Мария Турантаева кэпсиир:
![](https://olonkho.nlrs.ru/wp-content/uploads/2023/06/ffed5f6c-db9f-45f7-a46e-f6eaab9965fe-1024x461.jpg)
-Олоҥхо ыһыаҕа ыытыллар улууһун түөлбэ олоҥхотун билиһиннэрэр үгэстээхпит. Ол сиэринэн, театрализованнай дьүһүйүүбүтүн Өймөкөөн олоҥхоһута Максим Филиппович Аммосов “Дугуйа Бөҕө” олоҥхотугар олоҕуран туруордубут. Томторго кэлэн, 10-ча хонук бэлэмнээтибит. Сүрүн режиссер уонна уус-уран салайааччы – Андрей Саввич Борисов. Киниэхэ Олоҥхо тыйаатырын артыыһа Байбал Колесов уонна Үҥкүү тыйаатырын артыыһа Изабелла Егорова көмөлөстүлэр. Сценарийын Майя Власьева суруйда. Худуоһунньуктарынан Сардаана Федотова, Михаил Егоров буоллулар.
Барыта 700-тэн тахса киһи кыттар. Итинтэн 150-на – Дьокуускайтан кэллэ: үҥкүү, олоҥхо, аҕыйах ахсааннаах хотугу норуоттар, үүнэр көлүөнэ тыйаатырдарын артыыстара, ону сэргэ ансаамбыллар.
Бу Олоҥхо ыһыаҕын уратыта – Дьөһөгөй оҕотун өрө тутуу. Ол курдук, дьүһүйүүгэ кыһыл көмүс аты кытта көрүөххүт.
![](https://olonkho.nlrs.ru/wp-content/uploads/2023/06/0830a8fb-2228-48d3-9e68-48ce9d720b9c-1024x968.jpg)
Итиэннэ Өймөкөөнү Өймөкөөн дэппит дьоҥҥо сүгүрүйэн, албаннаах ааттарын ааттыахпыт. “Кимнээхтэрий?” диэн сэҥээрэр буоллаххытына, бастатан туран, аҕыс улууһу аһаппыт, тоҕус улууһу тоторбут, оскуолалары туттарбыт, саха саргытын түстэспит меценат Николай Осипович Кривошапкин- Атыыһыт Кырбаһааҥкын; Өймөкөөҥҥө сэттэ төгүл кэлэ сылдьыбыт айар тыл аҕата, улуу Өксөкүлээх Өлөксөйбүт; күн бүгүн Өймөкөөн олоҥхотун, үһүйээнин билэр эбит буоллахпытына, ону чинчийэн, сурукка-бичиккэ үйэтиппит Сэһэн Боло.
![](https://olonkho.nlrs.ru/wp-content/uploads/2023/06/89e56ab7-689d-4c83-a651-b330187bba53-786x1024.jpg)
Аҥаардас уруккуну эрэ уруйдаабаппыт, аныгыны эмиэ айхаллыыбыт. Өймөкөөн билиҥҥи кэмин бухатыырдарын – саха сылгытын суон сурахтаабыт Дугуйдан Винокуровы, аан дойду муҥутуур чыпчаала – Эверест аарыма хайатын үрдүгэр – сахалартан бастакынан тахсыбыт Евгений Кривошапкины уонна анал байыаннай эпэрээссийэҕэ “Боотур” этэрээтин биир бастакынан хомуйан хамандыырдаабыт, Арассыыйа Геройа Александр Колесовы — албаннаахтык ахтан ааһыахпыт. Онон дьүһүйүүбүт былыргы уонна быйылгы ситимин бигэргэтиэҕэ.