Балаҕан ыйын 30 күнүгэр Майаҕа күн иккис аҥаарыгар Д.Ф.Ходулов аатынан култуура киинигэр Олоҥхо тыйаатырын артыыһа, СӨ култууратын туйгуна, РФ театральнай диэйэтэллэрин сойууһун чилиэнэ, 2015 с. ыытыллыбыт Норуоттар икки ардыларынааҕы “Золотой петух” 24-с киинэ бэстибээлин “Самая популярная иностранная актриса” анал аат кыайыылааҕа, Норуоттар икки ардыларынааҕы 4-с киинэ бэстибээл “Дьахтар бастыҥ оруола” анал аат Гран-При хаһаайына, 2016 с. саха киинэтин таптааччылар “Көрөөччүлэр биһирэбиллэрэ” аат кыайыылааҕа Галина Ивановна Тихонова (1987-2018 сс.) сырдык кэриэһигэр анаан “Кыыс Дэбилийэ» олоҥхо-испэктээкил көрдөрүлүннэ.
Бэлиэ күҥҥэ СӨ култууратын туйгуна Мария Васильевна Турантаева дириэктэрдээх Олоҥхо тыйаатырын кэлэктиибэ бары кэриэтэ көһөн тахсыбыттар. Сааланы толору мустубут көрөөччүлэргэ РФ уонна СӨ норуодунай артыыһа Степанида Борисова киирии тылы эттэ: “Бүгүн биһиэхэ олус үөрүүлээх күн. Устудьуоннарбын кытта 1-кы куурустан бииргэ үөрэммит Галина Тихонова кинигэтэ сүрэхтэннэ. Наһаа үчүгэй кинигэ тахсыбыт. Сүрдээх талааннаах артыыска этэ. Элбэхтик киинэҕэ уһуллубута Саха сиригэр, Арассыыйаҕа, кыраныысса таһыгар даҕаны. Олоҥхо тыйаатырыгар бары саамай таптыыр уонна күүстээх артыыспыт буолар. Аны эһиэхэ көрдөрөөрү Кыыс Дэбилийэ олоҥхо-испэктээкили аҕаллыбыт. Манна Галина Ивановнаны кытта бииргэ үөрэммит уонна үлэлээбит Олоҥхо тыйаатырын артыыстара оонньуохтара”.
Галина Тихонова бииргэ төрөөбүт убайа, СӨ Ыччат бэлиитикэтин туйгуна, Мэҥэ Хаҥалас улууһун баһылыга Дмитрий Тихонов: “Бүгүн биһиэхэ олус долгутуулаах күн. Биһиги балтыбытын, оҕобутун аатын үйэтитэр дьон-сэргэ ахтыытыгар олоҕуран оҥоһуллубут кинигэни сүрэхтээтибит. Бу кинигэ тахсыытыгар күүс-көмө буолбут дьоммутугар, ахтыы биэрбит доҕотторугар, учууталларыгар, уһуйааччыларыгар аймахтар ааттарыттан ис сүрэхпиттэн сүһүөхтээх бэйэм сүгүрүйэн туран махталбын тиэрдэбин. Галина Ивановнаны ытыгылаан, кинини ахтан-санаан ааһаары бу тэрээһиҥҥэ кытта кэлбиккитигэр улахан махталбын тиэрдэбин” диэтэ уонна Галина уһуйааччыларыгар Степанида Ильинична Борисоваҕа, Мария Васильевна Турантаеваҕа итиэннэ 4 оҕону сүһүөхтэригэр туруорбут ийэтигэр Варвара Титовна Тихоноваҕа тыыннаах сибэкки дьөрбөлөрүн туттарда. Бэлиэ күҥҥэ Мэҥэ Хаҥалас улууһун баһылыгын социальнай уонна имиджевай бэлиитикэҕэ солбуйааччы Альбина Григорьева кыттан бэйэтин эҕэрдэтин тиэртэ.
Кыыс Дэбилийэ оруолун биир дойдулаахпыт Ньургуйаана Маркова, Чугдаан Бухатыыры Дмитрий Алексеев оонньоотулар.
Былыр-былыргыттан ыллаан-туойан, үҥкүүлээн-оонньоон биир киһи соҕотоҕун хас да түүннээх күнүс көмүлүөк иннигэр оҥостон олорон туойан бар дьоҥҥо үрүҥ-хара, үтүө-мөкү, үөһээ-аллараа дойдулары араастаан хоһуйан кэлбит улуу айымньыта Олоҥхобут аан дойду барҕа баайынан билиниллибитэ. Ону билигин тыйаатыр артыыстара оруолларынан үллэстэн, муусуканан, уотунан-күөһүнэн киэргэтэн, дьону-сэргэни сырдыкка-кэрэҕэ угуйан кырдьык уонна үтүө быһыы өрүү кыайарын, Айыы бухатыыра абааһы аймаҕын кыайарын олоҥхолоон көрдөрөллөрө аан дойду биһирэбилин ылыан ылар буоллаҕа…
Олоҥхо киэһэтин олохтоохтор, ыалдьыттар сэргээн көрдүлэр, ытыстарын тыаһын харыстаабатылар.
Марелла Баишева.
