Бүгүн Ил Дархан Айсен Николаев ыйааҕынан СӨ Култуураҕа уонна духуобунай сайдыыга   миниистирин дуоһунаһыгар Афанасий Ноевы анаата.

Култуура уонна духуобунас сайдыытын миниистирэ Афанасий Иванович Ноев үлэтин ис хоһоонун уонна суолтатын туһунан санаатын бу курдук үллэһиннэ:

— Бүгүҥҥү тэтимнээх кэмҥэ култуура салаата уопсастыбаҕа хаһааҥҥытааҕар даҕаны улахан суолталаах. Култуура үлэһиттэрин сүрүн соруга — өбүгэлэрбит духуобунай сыаннастарын харыстыыр уонна салгыы тиэрдии. Ол эбэтэр дьиэ кэргэҥҥэ Ийэ дойдуга бэриниилээх буолууну иҥэриигэ, сиэри-майгыны тутуһууну бөҕөргөтүүгэ олоҕуран үлэ барыахтаах. Сотору Ил Дархан Айсен Николаев Саха Өрөспүүбүлүкэтигэр духуобунай, сиэрдээх майгы иитиитигэр туһуламмыт уурааҕа тахсыаҕа. Бастатан туран, киһи олоҕун сыаналааһын, өйөөһүн тула үлэ ыытыллыахтаах. Киһи үлэтэ кэмигэр сыаналаныахтаах. Ордук айар үлэһиттэргэ болҕомто ууруллуоҕа. Ыччаппытыгар тирэҕириэхпит. Тыйаатырга, култуурунай тэрилтэлэргэ сылдьыы хааччахтаныа суоҕа, баҕалаах дьоҥҥо култуура дьиэлэрин ааннара аһаҕас буолуоҕа. Тыа сиригэр култуура дьиэлэрин, улуус кииннэригэр духуобунас кииннэрин тутууну салгыахпыт. РФ култуураҕа туһуламмыт национальнай бырайыактарын олоххо киллэриинэн сибээстээн, федеральнай үбү-харчыны тардыахпыт. Түмэллэр, ускуустуба дьиэлэрин материальна-тиэхиньиичэскэй баазаларын хаҥатыыга болҕомто ууруллуоҕа. Кэлиҥҥи сылларга олоҥхоһуттарга, оһуохайдьыттарга, тимир уустарыгар, норуот маастардарыгар дьоһуннаах өйөбүл оҥоһуллар буолла. Бу үлэ салҕаныаҕа. Култуурунай тэрээһиннэр  нэһилиэнньэ бары араҥатын тардар, кыттыһыннарар соруктаах буолуохтара диэн эрэнэбин.

https://sakha-sire.ru/afanasij-noev-kihi-ylete-kemiger-syanalanyahtaah/