Хаартысканы ааптар тиксэрдэ

Сахаларга сэтинньи ый олоҥхо уонна хомус ыйынан биллэр. Өбүгэлэрбит бу ыйтан саҕалаан уһун киэһэлэргэ саха норуотун чулуу айымньыта буолбут олоҥхону истэллэрэ.

Сэтинньи 9 күнүгэр Сунтаарга Сибиэрэп киинигэр Олоҥхо ыйын үөрүүлээх аһыллыыта буолла. Бу күн киин мунньахтыыр саалатын саха ыалын балаҕанын курдук оҥорбуттара, кэлбит дьону урукку кэм туругар киллэрдэ. Саха ыалын сиэринэн ыалдьыттарга итии чэй, тутатына буспут алаадьы, саламаат түҥэтэн күндүлээтилэр. Онтон оллоонноон олорон олоҥхо иһиттилэр. Сунтаар сураҕырбыт олоҥхоһуттара Айсен Федоров «Дьырыбына Дьырылыатта», Александра Яковлева «Оҕо Тулаайах», Наталья Эконова  «Кус Көҕөн Уола Күн Ньургун Бухатыыр», Ефим Афанасьев  «Кулдус Бөҕө» олоҥхоттон быһа тардыылары толордулар. Көрөөччүлэр «Ноо» диэн саҥа аллайан олоҥхоһуттары сэргээбиттэрин биллэрэ олордулар.

Кэлбит ыалдьыттар ураты тыыннаах тэрээһиҥҥэ сырыттыбыт диэн санааларын үллэһиннилэр. Сэтинньы  устата олоҥхоҕо, хомуска сыһыаннаах араас тэрээһиннэр тиһигин быспакка ыытыллыахтара. Ол курдук, оҕолорго «Олоҥхо КВИЗ» оонньуу, уруһуй быыстапкалара, нэһилиэктэринэн олоҥхолоох айан, СӨ норуодунай худуоһунньуга, реставратор, РФ худуоһунньуктарын сойууһун чилиэнэ Т.А.Степанов 80 сылыгар аналлаах тэрээһин, олоҥхонон киирсии (Олоҥхо баттл) ыытыллыахтара. Олоҥхо ыйа бу курдук сэргэх тэрээһининэн саҕаланна.

Мира Афанасьева, Сунтаар