Александра Жиркова -Дьүөрэл Уус Алдан улууһун Өлтөх нэһилиэгэр төрөөбүтэ. 1984 сыллаахха Саха судаарыстыбаннай университетын биологияҕа-географияҕа факультетын бүтэрбитэ. Александра бэйэтин өйдүүр буолуоҕуттан өрүү уоһун иһигэр киҥинэйэн ыллыыр ырыалаах сылдьар. Эдэркээн сааһыттан чуор куоластаах ырыаһыт. Бэл, оскуола кэнниттэн төрөөбүт Өлтөҕөр ыанньыксыттыы сылдьан, Саха араадьыйатыгар ыллыырга ыҥырыллыбыт. Онно анаан-минээн уһулла баран иһэн массыыналара суол ортотугар алдьанан, кыһыҥҥы тымныыга тоҥон-хатан, хата, болдьоммут чааһыгар этэҥҥэ тиийэннэр, Виталий Андросов «Баара буолуо» диэн ырыатын ыллаабытын умнубат. Устудьуон сааһыгар спортсменка бэрдэ, устудьуоннар хайыһарга десаннарын кыттыылааҕа. Эдэр сааһа ырыа аргыстааҕа.
Дьүөрэл — уран куттаах, айар талааннаах киһи. Киниэхэ дьахтар сатыыра, талаана-дьоҕура барыта баар. Иистэнньэҥ, быысабайдьыт бэрдэ. Минньигэс астаах асчыт. Өлгөм үүнүүлээх оҕуруоччут бастыҥа. Оннооҕор кураан дьылларга 200-чэ киилэ моркуобу, соччо сүбүөкүлэни, оҕурсуну, кабачогу, тыкваҕа, клубникаҕа, дьэдьэҥҥэ тиийэ үүннэрэн, туустаан-тумалаан, кэнсиэрбэлээн бэлэмнээн, дьонун-сэргэтин аһынан-үөлүнэн хааччыйар хаһаастаах хаһаайка. Ол туһунан биир дьыл «Саха» НКИХ телевидениетыгар сырдатан тураллар.
2020 сыллаахтан Саха Өрөспүүбүлүкэтин Суруйааччыларын Сойууһун чилиэнэ. Хоһоонноро «Чолбон» сурунаалга, «Саха сирэ», «Мүрү саһарҕата» хаһыаттарга бэчээттэммиттэрэ. «Күннээх ыллыктарым», «Ньургуһуннаах үс кутум» диэн хоһооннорун хомуурунньуктара тахсыбыттара. Дьүөрэл бэйэтин хоһоонноругар матыып айан билигин 200-чэ ырыалаах. Түөрт уон сааһын кэнниттэн ырыа матыыптара киирэр буолбуттар. “Нуотаны билбэт буоламмын, урукку кэмнэргэ элбэх ырыа матыыбын куоттарбытым. 2015 сыллаахтан кыыһым эргэ айфонун бэлэхтиэҕиттэн диктофоҥҥа анаан устар буолбутум”, — диир Александра. Кини сахалыы тыыннаах ырыалара “Тэтим”, сахалыы “Виктория” долгуннарыгар бэйэтин, эстрада артыыстара Анастасия Готовцева, Варя Аманатова о.д.а. толорууларыгар дуорайаллар. «Дорҕоон дойду» салайааччыта Герасим Павлов Дьүөрэл айымньытын сэргээн, саҥа ырыалары айда. Дьүөрэл ымыылаах ырыаларын төбүрүөннээх түһүлгэтин бииргэ бэлэмнээтилэр.
Сарсын, сэтинньи 22 күнүгэр П.А. Ойуунускай аатынан Саха академическай тыйаатырыгар Александра Жиркова-Дьүөрэл «Күннээх ыллыктарым» диэн ырыалаах дьоро түһүлгэтэ эстрада уонна Олоҥхо тыйаатырын артыыстара кыттыылаах тыыннаах доҕуһуолунан тэриллиэҕэ. Ааптар ырыаларын эһиэхэ анаан бэйэтэ эмиэ толоруоҕа. Кини бэйэтин ырыа буолбут хоһоонугар эппитинии, «Ырыа барахсан, ыраҕын ситэрэн, ыраахха көтүттүн, алгыстаах айаныҥ кыната буоллун дуу” диэн Дьүөрэлгэ ырыаларыҥ дьон дууһатыгар тиийэригэр баҕарабыт.
Александра Жиркова —Дьүөрэл айар киэһэтиттэн киирбит үп анал байыаннай дьайыыга сылдьар биир дойдулаахтарбытыгар кыһыҥҥы таҥас ылыытыгар ананыаҕа.
Валентина Бочонина