Култуура уонна духуобунай сайдыы министиэристибэтин уонна тус бэйэм ааппыттан Олоҥхо күнүнэн итиитик-истиҥник эҕэрдэлиибин!
Өрөспүүбүлүкэҕэ Олоҥхо дэкээдэтэ сэтинньи 10 күнүттэн ыытылла турар. Быйылгы Олоҥхо ыйа оҕолорго, ыччакка ананан, ордук болҕомто уурулунна. Онон кэнчээри ыччаппыт норуоппут уостубат баайын иҥэриннэ, ыкса билистэ буолуо диэн саарбахтаабаппын.
Бу сыллар тухары улуустарынан Олоҥхо ыһыаҕа бэрт үрдүк таһымнаахтык ыытыллан кэллэ. Сылтан сыл тэрээһиннэр тупсан, таһымнара үрдээн иһэр.
Быйылгы Олоҥхо ыһыаҕа Өймөкөөҥҥө бэрт сэргэхтик ааспыта, дьон-сэргэ бүтүн өрөспүүбүлүкэттэн кэлэн ыалдьыттаабыттара.
Кэлэр 2024 сылга Олоҥхо ыһыаҕа Амма улууһугар биир саамай бэлиэ тэрээһининэн буолуоҕа. Амма улууһа бу да сырыыга үрдүк таһымҥа ыытыаҕа диэн эрэнэбин.
Бу күн Олоҥхо сайтыттан Бүөтүр Оҕотоойоп «Эһэ хара аттаах Элэс Боотур», Николай Бурнашов-Боодьоҕос «Кыыс Дэбилийэ», Митрофан Мартынов «Уол Дуолан бухатыыр» олоҥхолоруттан быһа тардан таһаарабын.
Толорооччулар: Диана Петухова, Айсен Федоров уонна Митрофан Семенов.
Аан дойду култууратын биир саамай чаҕылхай көстүүтүн Олоҥхону киэҥ араҥаҕа тарҕатар, үйэтитэр дьонноохпутунан ис сүрэхпиттэн үөрэбин уонна киэн туттабын!
Норуоппут өркөн өйүн күүһүн-күдэҕин көрдөрөр, киһи аймах уус-уран тылынан чыпчаал айымньыта көлүөнэттэн көлүөнэҕэ бэриллэ туруохтун!