2023 сыл – Саха сиригэр Үлэ сыла. Иван Николаевич Егоров – Горнай аатынан көрбөт уонна мөлтөхтүк көрөр дьон анал бибилэтиэкэлэригэр  сыл устата «Интириэһинэй көрсүһүүлэр» кулуупка  араас эйгэҕэ ситиһиилээх,  биллэр-көстөр дьон  ыалдьыттаан аастылар.

Идэҕэ хардыы оҕо саастан саҕаланар: идэлэригэр ситиһиилээх дьоннуун сэһэргэһии оҕоҕо, ыччат дьоҥҥо умнуллубат, кэрэхсэбиллээх түгэн буолара саарбаҕа суох.

Сахабыт сиригэр ыытыллар Олонхо күнүн көрсө, Олонхо тыйаатырын уонна  киинэ эдэр, талааннаах артыыһа Мария Михалева – Айыы Куо ыалдьыттаата.

Олус сэргэх кэпсээннээх, сырдыгынан сыдьаайар ыалдьыппыт – Айыы Куо кыра сааһыттан ускуустубаҕа курдаттыы умсугуйан, ырыа-хоһоон, тыйаатыр, киинэ эйгэтигэр айар ыллыга сирдээн аҕалбытын туһунан сиһилии сэһэргээтэ.  Сахалыы сиэрдээх, уйан куттаах, эргиччи талааннаах ыалдьыппыт саҥаран-иҥэрэн, ыллаан-туойан барбытыгар  тыйаатыр сыанатыгар, киинэ оруолугар  оонньуур олоҥхо, остуоруйа дойдутун Кэрэ Куотун уобараһын көрдүбүт.

Сэргэх сэһэргэһиигэ артыыс идэтин, киинэҕэ оруоллар тустарынан ураты ыйытыктаах көхтөөх кыттааччылар өйдөбүнньүк бэлэх тутан, автограф ылан үөрэн-көтөн тарҕастылар. Истиҥ ыалдьыппытыгар кэпсэтииҥ иһин махтанабыт, айар үлэҕэр ситиһиилэри баҕарабыт.

Ульяна Чичигинарова