Саха Республикатын үтүөлээх артыыһа Зоя Гаврильевна Попова тыйаатыр уонна киинэ артыыһа, маны сэргэ хоһоонньут уонна тылбаасчыт.

Үтүөкэн киһибит «Көҥөс иэйии” уонна “Пьесалар тылбаастара” диэн икки кинигэтин сүрэхтэниитэ сэтинньи ый 28 күнүгэр Национальнай библиотека историческай саалатыгар буолан ааста. Биэчэри саха академическай театрын литературнай салаатын сэбиэдиссэйэ Надежда Ивановна Ильина иилээн-саҕалаан ыытта. Майя Николаевна Власьева — Олоҥхо театрын литературнай салаатын сэбиэдиссэйэ, ааптары хоһоонньут уонна тылбаасчыт эрэ курдук буолбакка, Олоҥхо ыһыахтарын сценариһын быһыытынан бииргэ үлэлээн кэлбиттэрин сиһилии кэпсээтэ. Надежда Осиповна Осипова – театровед, Зоя Попова пьесаларын тылбаастарын ырытыытын оҥордо.

Ону таһынан СР народнай артыыһа Анатолий Николаев, Олоҥхо театрын салайааччыта Мария Турантаева, Саха театрын директора Петр Макаров, сүрүн режиссер Руслан Тараховскай, филологическай наука доктора Василий Илларионов ону сэргэ биир дойдулаахтра эҕэрдэлээтилэр.

Олоҥхо театрын, Саха театрын араас көлүөнэ артыыстара Зоя Попова хоһоонноруттан, испээктэкиллэриттэн театрализованнай дьүһүйүүнү көрдөрдүлэр.