Ахсынньы 9 күнүгэр Бүлүү куоратыгар олоҥхоһут В.О. Каратаев аатынан Олоҥхо Дьиэтигэр Педагог уонна Наставник сылынан “Сыл бастыҥ уһуйааччыта – 2023» өрөспүүбүлүкэтээҕи күөн-күрэс кыайыылааҕа, 2024 сылга СӨ Ил Дархан стипендиата, Н.Н. Каратаев аатынан Тааһаҕар орто оскуолатын “Үрүмэччи” оҕо фольклор ансаамбылын уһуйааччыта, В.О. Каратаев аатынан олоҥхоһуттар уонна тойуксуттар норуодунай коллективтарын кыттыылааҕа, СӨ үөрэҕириитин уонна култууратын туйгуннара, педагогическай үлэ бэтэрээнэ Григорьева Маргарита Егоровна үлэтин опытыгар олоҕуран ыытыллыбыт өрөспүүбүлүкэтээҕи “Олоҥхо уонна уһуйааччы” семинар бэрт тэрээһиннээхтик, таһымнаахтык буолан ааста.
Семинарга Бүлүү улууһун нэһилиэктэриттэн, култуура, үөрэх тэрилтэлэриттэн уонна Кэбээйи, Горнай, Ньурба улуустарыттан, Дьокуускай куораттан араас темаларынан барыта 16 дакылааты иһиттибит. Уһуйаан иитээччилэрэ, оскуолаҕа саха тылын учууталлара эйгэни хайдах тэрийэн, оҕону детсад сааһыттан олоҥхоҕо хайдах сыһыаран, ханнык ньымалары туттан үлэлииллэрин, оҕо төрөөбүт тылын сайыннарыыга, олоҥхонон кэрэ эйгэтигэр, сиэрдээх быһыыга уһуйууга хайдах үлэлииллэрин бэйэлэрин үлэлэрин опытыттан сиһилии билиһиннэрдилэр.
Маргарита Егоровна оҕону кыра сааһыттан олоҥхоҕо сыһыаран, хайдах үөрэтэн, уһуйан, туох ыарахаттары көрсөн үлэлээн, тугу ситиспитин барытын арыйан кэпсээтэ.
Семинарга кыттыбыт уһуйааччылар олус туһалаах кэпсэтии буолла диэн бэлиэтээтилэр, маннык наадалаах семинардары былааҥҥа киллэрэн ыыта турарга уонна салгыы бииргэ үлэлииргэ санааларын этэн, астынан тарҕастылар.
Бүлүү улууһун нэһилиэктэрин уонна куоратын уһуйааннарыгар, оскуолаларыгар санааларын ууран, олус бэрткэ үлэлиир уһуйааччылар, учууталлар баалларын бэлиэтээтибит. Бу дьоммутугар салгыы болҕомто ууруллан, үлэлэрин опытын тарҕатан, тиһиктээх үлэ барарыгар эрэнэбит Семинар кыттыылаахтарыгар тэрийээччилэр Туоһу уонна Махтал суруктары, анаан оҥотторбут өйдөбүнньүк бэлиэлэрин туттардылар.
Бүлүү улууһугар В.О. Каратаев аатынан олоҥхоһуттар уонна тойуксуттар норуодунай коллективтара баар буолан, салайааччы Светлана Тарасовна Иванова көҕүлээһининэн, олоҥхону сөргүтүүгэ, ыччакка тиэрдиигэ, үлэ опытын тарҕатыыга уонна олоҥхолооһун үгэстэрин сайыннарыыга былааннаах, тиһиктээх үлэ ыытылларын биһириибит, холобур туттабыт, махтанабыт.
Семинар кэнниттэн Светлана Тарасовна бэлэмнээн таһаарбыт «Бүлүү олоҥхото – быстыбат ситим» дьоһуннаах кинигэ күн сирин көрбүтүн бэлиэтиир үөрүүлээх түгэн өрө көтөҕүллүүлээхтик буолан ааста.
Кинигэҕэ Бүлүү түөлбэтин урукку кэмин биллиилээх олоҥхоһуттарын олоҥхолоро уонна билиҥҥи кэм олоҥхоһуттарын олоҥхо киэбинэн суруллубут айымньылара таҥыллан киирбиттэр. Онон кинигэ киэҥ ис хоһоонноох, кюар код нөҥүө олоҥхолору киһи истиэн, ааҕыан сөп. Бу кинигэ Бүлүү түөлбэтин олоҥхотун салгыы үөрэтиигэ уонна түөлбэ олоҥхолору сэҥээрэн, толорооччу элбииригэр туһалаах буоларыгар эрэнэбит.
Светлана Тарасовна үйэтитэр үлэҕэ былааннаахтык үлэлиир, саҕалаабыт үлэтин тиһэҕэр тиэрдэн, түмүктээн иһэр уонна бииргэ үлэлиир дьонугар ураты болҕомтолоохтук сыһыаннаһар үтүө хаачыстыбалаах холобур туттар салайааччыбыт буолар.
Бүлүүгэ киэҥ ис хоһоонноох тэрээһиҥҥэ сылдьан, былааннаах үлэ барарын көрөн-истэн, салгыы үлэлииргэ баҕалаахтарыттан астынан кэллибит.