С.Н.Донской-II аатынан Үөрэҕи сайыннарар уонна идэни үрдэтэр үнүстүүт, СӨ АТ «Олоҥхо тыйаатыра», научнай-методическай үлэҕэ уонна тас сибээскэ Олоҥхо Киинэ, Дьокуускай куорат үөрэҕин салалтата, Айыы кыһата национальнай гимназията тэрийэн ыытар норуот тылынан уус-уран айымньытын чыпчаала буолбут — олоҥхобут тылын-өһүн дириҥник билэргэ туһуламмыт IV өрөспүүбүлүкэтээҕи олоҥхо олимпиадатын түмүгэ таҕыста.
Уус-уран тылынан сааһылаан суруйары, ааҕары иҥэрэр, сиһилии ымпыктаан быһаарар сүдү айымньы олоҥхобут буоларын биллэрэр сыаллаах олимпиадаҕа 7 кылааска — 66, 8 кылааска-53, 9 кылааска — 65, 10 кылааска — 42 үөрэнээччи Алдан, Амма, Абый, Булун, Нам, Ньурба, Мэҥэ Хаҥалас, Сунтаар, Бүлүү, Уус Алдан, Үөһээ Бүлүү, Кэбээйи, Таатта, Горнай, Мииринэй, Өлүөхүмэ, Өймөкөөн, Чурапчы, Хаҥалас, Уус Дьааҥы, Үөһээ Халыма, Үөһээ Дьааҥы, Эдьигээн, Эбээн-Бытантай, улуустарыттан уонна Тулагыттан, Дьокуускай куораттан, ол иһигэр 2-с, 12-с, 17-с, 26-с, 31-с №-х оскуолаларттан, Саха политехническэй лиссиэйиттэн, Национальнай гимназияттан – барыта өрөспүүбүлүкэ 24 улууһуттан 226 оҕо кытынна. Манна даҕатан эттэххэ, 2020 сылга- 14, 2021 сылга — 16, 2022 сылга 22 улуус кыттыыны ылбыта.
Олоҥхо олимпиадатын сорудаҕа түөрт түһүмэхтээҕэ «Олоҥхо ис хоһооно», «Олоҥхо уран тыла», «Олоҥхо – үтүө санаа өрөгөйө», «Олоҥхо тылдьыта».
Кылаас ахсын сорудахтар үөрэх бырагырааматынан киирбит олоҥхолорго тирэҕирбитэ. Кыттааччылар түһүмэхтэр сорудахтарын араастаан толорбуттар.
Хоруйдарыттан көрдөххө, куйаар ситиминэн ыытылларын быһыытынан сорудахтары кэмигэр хачайдаан ылбакка эбэтэр сибээс тэтимэ бытааран, сүнньүнэн техническэй мэһэй баар буолан сорох түһүмэхтэргэ хоруй суох.
Кэлэр үөрэх дьылыгар улуус таһымыгар сүүмэрдиир түһүмэх ыытыллара тоҕоостоох. Ортотунан үчүгэй көрдөрүүлээх үлэлээх үөрэнээччи салгыы чыпчаал түһүмэххэ кыттар кыахтанара ордук. Эппиэттэр ис хоһоонноругар ордук хоһу, бөрүкүтэ суох тыллаах хоруйдар эмиэ бааллар. Хас бииирдии кыттааччы – учуутал, оскуола сирэйэ буолар. Уопсай боротокуолга аһара кыра бааллаах, олох да баал ылбатах, кыттыахха эрэ диэн кураанах көрдөрүү соччото суох.
Куйаар ситиминэн ыытыллыбыт олоҥхо олимпиадатыгар көхтөөхтүк кыттыбыт бары үөрэнээччилэри уонна учууталлары эҕэрдэлиибит! Туоһу суругу хас биирдии кыттааччы хачайдаан ылар. Кыайыылаахтарга, миэстэлэспиттэргэ, биһирэбил дьупулуом ылбыт кыттааччыларга наҕараадаҕыт электроннай почтаҕытыгар ыытыллыаҕа.
Олоҥхону билэр, ааҕар, ырытар дьоҕургут сайда турдун!
Дьүүллүүр сүбэ
7-кылаас.-Олоҥхо-олимпиадатын-түмүгэ-2023с.Скачать
8-кылаас.-Олоҥхо-олимпиадатын-түмүгэ-2023с.Скачать