Олунньу 11 күнүгэр Олоҥхо дьиэтигэр долгутуулаах тэрээһин буолан ааста. Степанова Тамара Прокопьевна сырдык кэриэһигэр кинигэ сүрэхтэниитигэр дьон-сэргэ толору мустубут.
Тамара Прокопьевна Степанова Ньурба оройуонун Түмүк нэһилиэгиттэн төрүттээх Бүлүү улууһугар үөрэх, култуура эйгэтигэр, дьиэ кэргэн уонна оҕо-ыччат олохторо туруктаах-тирэхтээх буоларын туһугар өр сылларга үгүс сыратын биэрэн үлэлээбитэ. Кини Саха республикатын үөрэҕириитин туйгуна, “Барҕарыы” республикатааҕы пуонда стипендиата, “Саха республикатын дьиэ кэргэн бэлиитикэтигэр кылаатын иһин”, “Саха республикатын Норуот айымньытын сайыннарыыга кылаатын иһин” бэлиэлэр хаһаайыннара, үлэ бэтэрээнэ. Кини норуот уустарын түмэн айымньылаахтык үлэлэппит, норуоппут төрүт култууратын тарҕаппыт, Бүлүү улууһун култууратын сайдыытыгар сүдү кылаатын киллэрбит, бэйэтин тула элбэх араас идэлээх, саастаах, санаалаах дьону түмпүт сатабыллаах салайааччы этэ.
Кинигэ “Саха сирин үтүөкэн дьоно” сиэрийэ иһинэн таҕыста. Ханнык баҕарар кинигэ тахсыыта элбэх толкуйтан, үлэттэн турар. Ол курдук бу кинигэ күн сирин көрөрүгэр улахан сыраларын, өйдөрүн-санааларын ууран туран, сүрүн үлэтин Тамара Прокопьевна дьүөгэтэ, үөлээннээҕэ Светлана Иванова, бииргэ төрөөбүт эдьиийэ Валентина Григорьева уонна кыыһа Лианна Саввинова оҥордулар. Үөрэтии-иитии, култуура эйгэтигэр уһуннук үлэлээбит, алтыспыт доҕотторун, үөлээннээхтэрин, дьонун-сэргэтин истиҥ-иһирэх ахтыылара уонна бэлиэтээһиннэрэ ааҕааччы киэҥ араҥатыгар таҕыстылар. Кинигэҕэ Тамара Прокопьевна араас сыллааҕы хаартыскалара, Махтал, Туоһу суруктара киирбиттэр. Маны таһынан 10 QR-код баар, ону сканердаах камера нөҥүө көрдөххө, Тамара Прокопьевна видеолара арыллаллар. Бу курдук саҥа киириини Леонид Менкяров, Дыгын Леонтьев уонна Дмитрий Иванов оҥорбуттар, кинигэ ис хоһоонун байыппыттар, ураты уйаҕас тыыннаабыттар эбит
Кинигэ биһирэмигэр дьиэ кэргэнэ, Бүлүүттэн, Ньурбаттан аймахтара, араас нэһилиэктэртэн бииргэ үөрэммит доҕотторо, үлэлээбит, алтыспыт коллегалара, үөрэппит уһуйааччылара кэлбиттэр. Биэчэри Луиза Кононова иилээн-саҕалаан ыытта, кинигэни билиһиннэрдэ. Тамара Прокопьевна эдьиийэ Валентина Ивановна балтын туһунан кэпсээтэ, бу кинигэ тахсарыгар хайдах үлэлээбиттэрин сырдатта. Ол курдук кинигэ сүрэхтэниитэ оруобуна Тамара Прокопьевна төрөөбүт күнүгэр сөп түбэһэрин курдук тэрийбиттэр эбит.
Улуус баһылыгын социальнай политикаҕа солбуйааччы Александр Прокопьев, куорат баһылыгын солбуйааччы Николай Иванов, улуус бэтэрээннэрин Сэбиэтин бэрэссэдээтэлэ Герасим Солтуев, Култуура дыбарыаһын информацияҕа салаатын сэбиэдиссэйэ Никита Додутов, методист Надежда Иванова уонна да атыттар Тамара Прокопьевна туһунан ахтан-санаан аастылар, кини ханнык баҕарар ылсыбыт дьыалатын тиһэҕэр тириэрдэр туруу үлэһит, олоххо мэлдьи көхтөөх позициялаах, сахатын дьонугар өссө да элбэҕи, үчүгэйи оҥоруох кэрэ киһи этэ диэн бэлиэтээтилэр. Бииргэ үлэлээбит коллегалара, норуот маастардара Тамара Прокопьевна курдук сырдык киһини кытта бииргэ алтыһан үлэлээбиппититтэн үөрэбит, киэн туттабыт диэн эттилэр. Тыл эппит дьон бары кини олус элэккэй, эйэҕэс-сайаҕас майгылаах, үтүө санаалаах этэ диэн аҕыннылар.
Тамара Прокопьевна оҕолоро Иван уонна Лианна кэлбит дьоҥҥо махтаннылар, үөрбүттэрин, долгуйбуттарын биллэрдилэр.
Үтүө киһи туһунан өйдөбүлү уһатар, дьоҥҥо-сэргэҕэ тириэрдэр – кэм ирдэбилэ. Тамара Прокопьевна Степанова үтүө аата өссө да уһун кэмҥэ ааттана туруо, кини олорбут олоҕо, дьон туһугар үлэлээбит сыралаах үлэтэ умнуллуо суоҕа, кэлэр ыччакка холобур буолуо диэн эрэнэбит.
Василина Татаринова.