Кулун тутар 15 күнүгэр Былатыан Ойуунускай аатынан Саха академическай театрыгар Олоҥхо Тыйаатырын артыыһа, СӨ үтүөлээх артыыһа, Ил Дархан стипендиата, олоҥхоһут, ньимҥакалаан, норуот ырыаһыта, СӨ «Гражданскай килбиэн», «Олоҥхону харыстааһыҥҥа, тарҕатыыга үтүөлэрин иһин» Ытык бэлиэлэр хаһаайыннара, икки омук култууратын тэҥинэн илдьэ сылдьар Валентин Гаврильевич Исаков 75 сааһын бэлиэтиир айар киэһэтэ олус истиҥник, долгутуулаахтык буолан ааста.
Үөрүүлээх дьоро киэһэ официальнай чааһыгар СӨ Бырабыыталыстыбатын солбуйар бэрэссэдээтэлэ Местников Сергей Васильевич СӨ Ил Дарханын Бочуотунай грамотатын туттарда. «Ил Түмэн» СӨ судаарыстыбаннай мунньаҕын бастайааннай кэмитиэтин бэрэссэдээтэлэ Губарев Виктор Николаевич «Ил Түмэн» СӨ судаарыстыбаннай мунньаҕын эҕэрдэ суругун, СӨ Арктика сайдыытын уонна хотугу норуоттар дьыалаларын, СӨ тас сибээскэ уонна СӨ норуоттарын дьыалаларыгар Министерстволарыттан бэрэстэбиитэллэр эҕэрдэ истиҥ тылларын анаатылар, бэлэхтэри туттардылар. СӨ култуураҕа уонна духуобунай сайдыыга миниистирин бастакы солбуйааччы Турантаева Мария Васильевна, СӨ Судаарыстыбаннай сүбэһитэ Борисов Андрей Саввич эҕэрдэ суруктары, бэлэхтэри туттардылар.
Дьоро киэһэҕэ Олоҥхо тыйаатырын артыыстара, эбэҥки талааннаах ыччаттара кытыннылар. Ырыа Саарын, Наталья Бриз, Синильга уонна Иванов Миитэрэй ырыанан-тойугунан киэргэттилэр, Аҕыйах ахсааннаах хотугу норуоттар үҥкүүлэрин судаарыстыбаннай тыйаатыра, “Эрэл” үҥкүү народнай тыйаатыра уонна “Гиркилиэн” үҥкүү ансаамбыла үҥкүүнэн-битиинэн киэргэттилэр. Мустубут дьон бары астына-дуоһуйа көрдүлэр.
Норуот талааннааҕын элбэх тэрилтэлэртэн, өрөспүүбүлүкэ улуустарыттан бэрэстэбиитэллэр хайдах курдук ытыктыылларын, талааныгар сүгүрүйэллэрин үрдүк сыанаттан тахсан эттилэр-тыыннылар, эҕэрдэлээтилэр.
Дьоро киэһэ иккис чааһыгар фуршет кэмигэр Валентин Гаврильевиһы кытта алтыспыт үөлээннээхтэрэ, олоҥхоһуттар, тэрилтэлэр, улуустар бэрэстэбиитэллэрэ, Олоҥхо Ассоциация уопсастыбаннай түмсүүттэн, Олоҥхо Кииниттэн, М.К.Аммосов аатынан ХИФУ-тан, ГЧуоннаХААНПИ-тан уонна хаан-уруу аймахтара истиҥ эҕэрдэлэрин, махталларын анаатылар, талааныгар сүгүрүйэллэрин биллэрдилэр, бэлэхтэрин туттардылар.
Валентин Гаврильевич олоҕун, айар үлэтин дьон-сэргэ хайдах курдук үрдүктүк сыаналыылларын көрөн-истэн, мустубут дьон бары санаалара көтөҕүллэн, үөрэ-көтө тарҕастылар.
Ытык-мааны киһибит, Валентин Гаврильевич, дьоһуннаах олоҕуҥ ыччаттаргар салҕаннын, тулалыыр эйгэҥ сырдык, үтүө санаалаах дьонунан арыалланнын! Чэгиэн-чэбдик туруктан, дьол-соргу аргыстан!
Протодьяконова Е.Н.,
Олоҥхо киинин фольклорга сүрүннүүр специалиһа