Олоҥхо тыйаатырын иһинэн үлэлиир «Дорҕоон дойду» айар түмсүү (сал.Г.Павлов-Дьарааһын) тэриллибитэ 10 сылыгар аналлаах «Дорҕоонноох доҕоттор» өрөгөй киэһэтэ муус устар 13 күнүгэр Кулаковскай аатынан норуоттар доҕордоһууларын дьиэтигэр бэрт үрдүк таһымҥа буолан ааста. Уруккуттан сөбүлээн истэр ырыаһыттарбыт Томпоттон Ольга Охлопкова, Анаабыртан Гаврил Спиридонов, Дьааҥыттан Виктор Стручков, Мэҥэ Хаҥаластан бырааттыы Сергучевтар, Өймөкөөнтөн Семен Сивцев, Андрей Старков о.д.а. кыттыыны ылбыттара кэнсиэри лаппа тупсарда.
Кэнсиэр саҕаланыаҕыттан сынньанан көрбөккө тыыннаах доҕуһуолунан эдэркээн уолаттар Егор Ефимов, Айсен Кысылбаиков, маны тэҥэ Дмитрий Готовцев, уонна салайааччылара Герасим Павлов-Дьарааһын араас үнүстүрүмүөннэргэ доҕуһуоллаатылар. Көрөөччүлэр тыыннаах толорууну өтөрүнэн истибэтэх буолан хас биирдии ырыаһыты «браво» хаһыынан көрүстүлэр. Буолумуна. Бары даҕаны бу ырыалары истэ олорон, эдэр сааспыт кэрэ кэмнэрин санаан долгуйан, уйадыйан ыллыбыт. Кырдьык даҕаны, тыыннаах муусука, ырыа-тойук кэнсиэрэ дууһа ортотунан киирэн, киһи сүргэтин көтөҕөн кыырай халлааҥҥа көтүтэрин маннык кэрэ түгэҥҥэ билэр эбиккин. Онон ким сылдьыбатах элбэҕи сүүйтэрдэххит буолуо. Ол эрэн Кыым телеграм ханаалбыт сурутааччыларыгар кылгастык устубут биидьийэбитин утары уунабыт.