Муус устар 12 күнүгэр Бүлүү куоратыгар саха биллиилээх олоҥхоһута В.О. Каратаев аатынан Олоҥхо Дьиэтигэр Саха Өрөспүүбүлүкэтин култууратын үтүөлээх үлэһитэ, Бүлүү улууһун уонна Чочу нэһилиэгин Бочуоттаах олохтооҕо, алгысчыт, олоҥхоһут, тойуксут, үҥкүү тылын этээччи, норуот ырыаһыта, хомусчут, уһуйааччы, Чочутааҕы норуот тыйаатырын режиссера Семен Иннокентьевич Иванов – Чочу Сэмэнэ төрөөбүтэ 90 сылыгар аналлаах тэрээһин чэрчитинэн Олоҥхо дьиэлэрин Өрөспүүбүлүкэтээҕи биир кэлим ситимин Алгысчыттара кыттыылаах Алгыс сиэрин-туомун толорууга маастар-кылаастар, “Айыы сиэрин тускуллара” төгүрүк остуол ыытылынна. Бу дьоро күнү Бүлүү Эбэ иһирэх иччилэриттэн, Ытык кырдьаҕастарыттан көрдөһөн, Аал уоту оттон, Айыылары күндүлээн, алҕаан Мэҥкэр Сэмэн Хабырыыл Уола арыйда.

Тэрийээччилэр: Өрүспүүбүлүкэтээҕи норуот айымньытын Дьиэтэ, “Олоҥхо Ассоциацията” Өрөспүүбүлүкэтээҕи уопсастыбаннай тэрилтэ, Саха Өрөспүүбүлүкэтин геокультурнай сайдыы института, Саха Өрөспүүбүлүкэтин Олоҥхо тыйаатыра, “Бүлүү улууһа (оройуона)” муниципальнай оройуон, “Бүлүү куората” муниципальнай тэриллии, “Култуура сайдыытын уонна норуот айымньытын оройуоннааҕы Киинэ”, Н.И.Ылахова аатынан “Алгыс” национальнай-култуурунай Киин, В.О. Каратаев аатынан олоҥхоһуттар уонна тойуксуттар норуодунай кэлэктииптэрэ.

Түһүлгэҕэ Арассыыйа театральнай диэйэтэллэрин Сойууһун чилиэнэ, Саха Өрөспүүбүлүкэтин култууратын үтүөлээх үлэһитэ Саргылана Саввична Адамова, Олоҥхо тыйаатырын артыыһа, режиссера, Саха Өрөспүүбүлүкэтин култууратын туйгуна Гаврил Семенович Менкяров уонна Александр Саввинов Баһылай Уола – Алгыстаах Өлөксөөн, Бүлүү улууһун бочуоттаах олохтооҕо, «Гражданскай килбиэн» бэлиэлээх Федот Петрович Иванов– Эмчит Сөдүөт кыттыыны ыллылар.

Алгыс түһүлгэтигэр 9 Алгысчыт кыттыыны ылла. Кинилэр биһиги олохпутугар күннэтэ туттан куппутун-сүрбүтүн күүһүрдэр, санаабытын сааһылыыр Алгыстар суолталарын арыйдылар, көрдөрдүлэр.

Дьоҥҥо-сэргэҕэ көмөлөһө, эмтии сылдьар ытык киһибит Бөтүҥтэн Ирина Петровна Прокопьева – Отоһут Өрүүнэ Сиэргэ-Туомҥа туттуллар оттор тустарынан билиһиннэрдэ.

Ол күн Иванов Семен Иннокентьевич – Чочу Сэмэнэ төрөөбүт дойдутугар Чочу нэһилиэгэр тахса сырыттылар. 2009 сыллаахха кини баарыгар өйдөбүнньүк бэлиэ турбут дьиэтин тиэргэнигэр ыраахтан кэлбит ыалдьыттар санаан-ахтан аастылар, сибэкки дьөрбөтүн уурдулар.

И.М.Гоголев-Кындыл аатынан Чочутааҕы түмэлгэ нэһилиэк историятын, чулуу дьонун сэргэтин туһунан түмэл дириэктэрэ Алексеева Галина Николаевна ыалдьыттарга сиһилии кэпсээтэ, көрдөрдө.

Бүлүү куоратыгар салгыы семинарга Саха оһуохайын, олоҥхотун өрө тутан толоро, тарҕата сылдьар Лөкөчөөн Алгысчыта, СӨ култууратын туйгуна Геннадий Петрович Харлампьев булка сылдьар айылҕа оҕото хара тыа иччитэ Баай барыылаах Байанайга алгыһын ыытар сиэри-туому билиһиннэрдэ. Норуот уус-уран айымньытын бары көрүҥнэрин толоруу баай үгэһин илдьэ сылдьар Арассыыйа нэһилиэнньэтигэр социальнай өҥөнү оҥорор харалта үтүөлээх үлэһитэ, СӨ социальнай сулууспатын туйгуна Каролина Петровна Харлампьева барыбытыгар үтүөнү, саргылаах санааны, ситиһиини алҕаата, күүстээх куту-сүрү иҥэрдэ. Улууспут дьоһун уонна түмсүүлээх түһүлгэлэрин Алгысчыта, СӨ култууратын туйгуна Мэҥкэр Сэмэн Хабырыыл Уола Алгысчыт буолуу тургутуутун ааһыы туһунан кэпсээбитин уонна Ыһыах алгыһын уратыларын сырдаппытын болҕойон иһиттибит.
Нюргуяна Капитоновна Саввинованы кэнники сылларга улуус, куорат тэрээһиннэрин Алгысчытын быһыытынан билэбит. Кини куту-сүрү бөҕөргөтүнэр Алгыһын тылын-өһүн, тойугун мустубуттар сэргээтилэр, ылыннылар.
Олох аналынан ыал буолан алаһа дьиэ туттан малааһын тэрийии олус үөрүүлээх түгэн Алгыһынан арчыланар үгэстээх. Үөһээ Бүлүүттэн ыалдьыппыт СӨ култууратын туйгуна, СӨ социальнай сайдыыга туйгуна, саха сиэрин-туомун билээччи, тарҕатааччы, Алгысчыт Валентина Владимировна Семенова саҥа дьиэҕэ киирии сиэрин-туомун көрдөрдө.
Ньурбаттан Оҕо ускуустубатын оскуолатын дириэктэрэ, СӨ үтүөлээх артыыһа, саҥа саҕалаан эрэр Алгысчыт Илья Николаевич Николаев Бэйэни күүһүрдүү Алгыһын икки түһүмэҕинэн Айыыларга уонна сирдээҕи иһирэх иччилэргэ анаата.
Арыылаах нэһилиэгин бочуоттаах олохтооҕо, кэнники кэмҥэ улууска эрэ буолбакка, өрөспүүбүлүкэ улуустарыгар ыҥырыллан алгыы-силии сылдьар Агафья Федотовна Мылахова Алгыһа ураты сонун буолла. Кини бу тэрээһин хас биирдии кыттааччытын аатын ааттаан, анабыллаах Алгыһынан арчылаата.
Алгысчыт Александр Саввинов Баһылай Уола – Алгыстаах Өлөксөөн, Федот Петрович Иванов – Эмчит Сөдүөт бэйэлэрин санааларын Алгыс тылын дириҥ ис хоһооно, өһүллүбэт сүдү күүһэ киһи өйүгэр-санаатыгар дириҥник хатанарын, санааны уһугуннарарын, туругун бөҕөргөтөрүн бэлиэтээтилэр. Алгыстаах Өлөксөөн бэйэни алҕаныы туомун көрдөрдө.
Түһүлгэни түмүктүүр кэпсэтиигэ Алгыс суолтатын, саха-сиэрин туомун оҕолорго, ыччаттарга, эдэр ыалларга тарҕатыыга анаан-минээн үлэлэһэргэ санаа атастаһыылар этилиннилэр.